मुंबई – पंतप्रधान नरेंद्र मोदी यांची छत्रपती शिवाजी महाराजांशी तुलना करणाऱ्या पुस्तकावरुन वाद सुरु असताना भाजप नेत्यांनी शरद पवार यांना ‘जाणता राजा’ म्हटलेलं कसं चालतं? असा प्रतिसवाल केला. त्यानंतर आज मुंबईत राष्ट्रवादी काँग्रेसच्या समर्थकांनी शरद पवारच ‘जाणता राजा’ असल्याचे पोस्टर्स लावले आहेत.
घाटकोपरमध्ये राष्ट्रवादी युवक काँग्रेसचे कार्याध्यक्ष नितीन देशमुख यांनी पोस्टर्स लावून शरद पवारांच्या ‘जाणाता राजा’ या उपाधीचं समर्थन केलं आहे. “आपापली राजकीय विचारसरणी निश्चित जोपासा, पण ज्या नेतृत्त्वामुळे महाराष्ट्र जगात ओळखला जातो त्या नेतृत्त्वावर अल्पमाहिती, अल्पज्ञानातून शिंतोडे उडवू नका. शरद पवार साहेब आम्हा तरुणांचे कालही जाणता राजा होते, आजही जाणता राजा आहेत आणि भविष्यातही जाणता राजा राहणारच”, या आशयाचे पोस्टर्स लावून राष्ट्रवादीने विरोधकांना प्रत्युत्तर दिलं आहे.
आज के शिवाजी- नरेंद्र मोदी’ या पुस्तकावरील वादावर बोलत असताना भाजप नेते उदयनराजे भोसले यांनी शरद पवारांचं नाव न घेता टीका केली होती. ‘छत्रपती शिवाजी महाराजांसारखा एखादाच युगपुरुष जन्माला येतो. जाणता राजा फक्त आणि फक्त शिवाजी महाराजच आहेत. त्यामुळे कोणालाही उपमा देतना विचार करायला हवा. इतर कोणालाही जाणता राजा ही उपमा दिली जात असेल तर त्याचा मी निषेध करतो. छत्रपतींशी तुलना तर सोडाच पण त्याच्या जवळपासही कुणी जाऊ शकत नाही’, असं उदयनराजे पत्रकार परिषदेत म्हणाले होते.
