औरंगाबाद : रक्षाबंधन सणाला काही तास उरले असताना भाऊ आणि बहिणीच्या नात्याला काळीमा फासणारी घटना समोर आली आहे.भावानेच अल्पवयीन बहिणीवर अत्याचार करीत तिला गर्भवती केल्याचा प्रकार घडला आहे. अत्याचारानंतर समाजात बदनामी होईल या भीतीने त्या पिडीतेने विषारी औषध प्राशन करून आत्महत्या केली. ही घटना वैजापूर तालुक्यातील विरगाव येथे समोर आली आहे. या घटनेमुळे एकच खळबळ उडाली आहे. पोलिसांनी त्या नराधम भावाला बेड्या ठोकल्या आहेत.
या प्रकरणी अधिक माहिती अशी की, आरोपी आणि मृत पीडिता हे दोघेही नातेवाईक आहेत. दोघेही नात्याने भाऊ – बहीण लागतात. नऊ महिन्यांपूर्वी पीडिता घरी एकटी असताना आरोपी तेथे गेला. एकटी असल्याची संधी साधून आरोपीने पिडीतेवर अत्याचार केला. तसंच, कोणाला काही सांगितल्यास जीव मारण्याची धमकी दिली. धमकीला घाबरून पीडितेने ही बाब कुणालाही सांगितली नाही.
मात्र यानंतर आरोपी भावाची हिम्मत अजून वाढतच गेली. त्याने वारंवार पीडितेवर अत्याचार केले. या अत्याचाराने पीडिता गर्भवती राहिली. आईला ही बाब कळल्यानंतर आईने विचारणा केल्यानंतर ही बाब समोर आली. समाजात बदनामी होईल या चिंतेत आई होती. सतत तणावात असणाऱ्या पीडित अल्पवयीन मुलीने शेतात फवारणी करायचे विषारी औषध सेवन करून आत्महत्या केली. या प्रकरणी वीरगाव पोलीस ठण्यात पोक्सो,आणि आत्महत्येस प्रवृत्त केल्याप्रकरणी गुन्हा दाखल करण्यात आला आहे. पोलिसांनी आरोपीला अटक केली आहे.
