वरणगाव-वेल्हाळा शिवारात बिबट्याच्या शिकारीचा संशय : संशयितांना वनविभागाने घेतले ताब्यात

जळगाव, (प्रतिनिधी) -जिल्ह्यातील मुक्ताईनगर वनपरीक्षेत्रातील वरणगाव-वेल्हाळा या वनपरिक्षेत्रात आज कुजलेल्या अवस्थेतील बिबट्याचा मृतदेह आढळल्याने एकच खळबळ उडालेली असून बिबट्याची शिकार झाल्याचा संशय व्यक्त केला जात आहे. याबाबत वनविभागाकडून सखोल चौकशी सुरू असल्याचे सांगण्यात आले. या शिकारीच्या संदर्भात वनविभागाला मिळालेल्या गोपनीय माहितीनंतर वेल्हाळा शिवारातून कोतवाल सद्या मोरे व कालू कोतवाल मोरे या पिता-पूत्रांना संशयीत म्हणून ताब्यात घेण्यात आल्यानंतर त्यांनी बिबट्याचे दात व हाडे काढून दिली आहेत.
या घटनेची माहिती मिळताच वनविभागाच्या अधिकार्‍यांनी घेतली धाव
वरणगाव-वेल्हाळा वनपरीक्षेत्रात बिबट्याचा कुजलेल्या अवस्थेतील मृतदेह असल्याची माहिती मिळाल्यानंतर सहायक वनसंरक्षक चि.रा. कांबळे, मुक्ताईनगरचे वनपरीक्षेत्र अधिकारी आशुतोष बच्छाव, वनपाल एल.डी.गवळी, वनरक्षक मुकेश बोरसे यांच्या पथकाने घटनास्थळ गाठले. घटनास्थळी केवळ बिबट्याची केवळ कातडी व शेपूट पथकाला आढळली तर नख व दात काढून नेण्यात आल्याचे स्पष्ट झाल्यानंतर बिबट्याच्या शरीराच्या अवशेषांचे नमुने पीसीएमबी हैद्राबाद प्रयोगशाळेकडे तपासणीसाठी पाठवण्यात येणार असल्याचे सांगण्यात आले. दरम्यान, बिबट्याची शिकार झाली की अन्य कुठल्या कारणाने त्याचा मृत्यू झाला हे तपासणी अहवालाअंतीच स्पष्ट होणार असल्याचे वनविभागाच्या सूत्रांनी सांगितले.