जळगाव, प्रतिनिधी :श्री राष्ट्रीय राजपूत करणी सेना सुप्रीमो संस्थापक अध्यक्ष स्व. सुखदेसिहंदादा गोगामेडी यांच्या जयंतीनिमित्त दि. १२ जुलै २०२६ रोजी जळगाव येथे भव्य कार्यक्रमाचे आयोजन करण्यात आले आहे. या कार्यक्रमाच्या नियोजनासाठी हॉटेल रॉयल पॅलेस येथे श्री राष्ट्रीय राजपूत करणी सेना, महाराष्ट्रचे प्रदेश कार्यकारी अध्यक्ष प्रवीणसिंह पाटील यांच्या अध्यक्षतेखाली महत्त्वपूर्ण नियोजन बैठक उत्साहपूर्ण वातावरणात संपन्न झाली.
बैठकीमध्ये समाजहिताच्या विविध उपक्रमांवर सविस्तर चर्चा करण्यात आली. यावेळी जयंतीनिमित्त राजपूत समाजातील विविध क्षेत्रांत उल्लेखनीय कार्य करणाऱ्या व्यक्तींचा सन्मान करण्याचा महत्त्वपूर्ण निर्णय घेण्यात आला.
कार्यक्रमात १०वी, १२ वी तसेच विविध स्पर्धा परीक्षा व उच्च शिक्षणात विशेष यश संपादन करणाऱ्या गुणवंत विद्यार्थ्यांचा गुणगौरव सोहळा, समाजातील विविध तालुक्यांमध्ये उत्कृष्ट सामाजिक कार्य करणाऱ्या समाजसेवकांचा सत्कार, जिल्हास्तरीय नगरपंचायत व महापालिकांमध्ये निवडून आलेल्या लोकप्रतिनिधींचा गौरव, समाजहितासाठी उल्लेखनीय योगदान देणारे उद्योजक, आदर्श शिक्षक पुरस्कार प्राप्त समाजबांधव तसेच शासकीय सेवेत पदोन्नती मिळालेल्या किंवा विविध शासकीय सेवांमध्ये नव्याने निवड झालेल्या समाजबांधवांचा विशेष सन्मान करण्यात येणार आहे.
याशिवाय ‘राजपूत समाज भूषण पुरस्कार’ प्रदान करण्याबाबतही बैठकीत सविस्तर विचारविनिमय झाला. समाजातील विविध क्षेत्रांत उल्लेखनीय योगदान देणाऱ्या व्यक्तींना या पुरस्काराने गौरविण्याचा निर्णय घेण्यात आला.
हा भव्य सामाजिक कार्यक्रम दि. १२ जुलै २०२६ रोजी सकाळी १०.०० ते सायंकाळी ४.०० वाजेपर्यंत सुदर्शन पॅलेस, शिरसोली रोड, जळगाव येथे आयोजित करण्यात आला असून, समाजबांधवांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजक श्री राष्ट्रीय राजपूत करणी सेना या सामाजिक संघटनेच्या वतीने करण्यात आले आहे.
जय माँ करणी जय एकलींग जी …
