मुंबई – नफ्याची गणिते मांडून नवनव्या उद्योगधंद्यामध्ये आपले प्रस्थ निर्माण करणाऱ्या रिलायन्स समूहाचे अध्यक्ष मुकेश अंबानी यांना एका नव्या इंडस्ट्रीने भुरळ घातली आहे. या इंडस्ट्रीचा थक्क करणारा वृद्धिदर आणि यातील प्रचंड व्यावसायिक संधी पाहून भविष्यात हीच इंडस्ट्री ‘रिलायन्स’साठी सोन्याची अंडी देणारी कोबंडी ठरेल, असे अंबानी यांना मनोमन वाटत आहे. त्यामुळेच एका जाहीर कार्यक्रमात अंबानी यांनी ‘या’ नव्या दमाच्या उद्योगात एंट्री घेण्याचे सूतोवाच केले.
नुकताच अंबानी यांनी ‘मायक्रोसॉफ्ट’चे सीईओ सत्या नडेला यांच्याशी मुंबईत संवाद साधला. यात त्यांनी गेमिंग इंडस्ट्रीचे भविष्य उज्ज्वल असल्याचे सांगितले. अंबानी म्हणाले की, सध्या भारतातील डिजिटल गेमिंगची उलाढाल ही म्युझिक, सिनेमा आणि टीव्ही शो या उद्योगांपेक्षा कित्येकपट अधिक आहे. तरुणाईला खेळवणाऱ्या या डिजिटल गेमिंगने नवा उद्योग उभा केला आहे.
दशकभरापूर्वी व्हिडीओ गेमबाबत इथल्या ग्राहकांमध्ये फारशी क्रेझ नव्हती, मात्र मागील काही वर्षात यात प्रचंड वाढ दिसून आली आहे. विशेषतः तरुणाईमध्ये डिजिटल गेम लोकप्रिय आहेत. पुढील दशक हे गेमिंग इंडस्ट्रीचे असेल, असा विश्वास त्यांनी यावेळी व्यक्त केला.
स्वस्त इंटरनेट आणि स्मार्टफोनचा झपाट्याने प्रचार झाला आहे. तरुणाईच्या हाती स्मार्टफोन आहेत. गेम डाऊनलोड्सची सर्वात मोठी बाजारपेठ म्हणून भारत उदयास आला आहे. एका अभ्यासानुसार बहुतांश स्मार्टफोन युझर्स गेमसाठी सरासरी एक तास वेळ घालवतात. त्यामुळे भविष्यात गेमिंग इंडस्ट्री सोन्याची अंडे देणारी कोबंडी ठरेल, असे अंबानी यांना मनोमन वाटत आहे. भारतात डिजिटल गेमिंग उद्योगासाठी पोषक वातावरण तयार करणे तसेच त्याची उत्पादने , कंटेंट तयार करण्यामध्ये प्रचंड संधी असल्याचं अंबानी यांचे म्हणणे आहे.
