वाहन कर्जाच्या चेक अनादरप्रकरणी कर्जदारास एक वर्ष साधी कैद; २ लाखांची नुकसानभरपाई
जळगाव : जळगाव जनता सहकारी बँकेकडून घेतलेल्या वाहन कर्जाच्या अंशतः परतफेडीसाठी दिलेला १ लाख ७७ हजार रुपयांचा चेक अनादरित झाल्याप्रकरणी न्यायालयाने आरोपीस दोषी ठरवत एक वर्ष साध्या कैदेची शिक्षा सुनावली आहे. तसेच २ लाख रुपये दंड/नुकसानभरपाई भरण्याचे आदेश दिले असून, ही रक्कम न भरल्यास आणखी एक महिन्याची साधी कैद भोगावी लागणार आहे.
नामदेव पौलाद पाटील यांनी जळगाव जनता सहकारी बँकेकडून वाहन कर्ज घेतले होते. या कर्जाची अंशतः परतफेड करण्यासाठी त्यांनी बँकेला १ लाख ७७ हजार रुपयांचा चेक दिला होता. मात्र, संबंधित चेक वटला नाही. त्यामुळे बँकेने आरोपीविरुद्ध निगोशिएबल इन्स्ट्रुमेंट्स ॲक्ट (NI Act) कलम १३८ अन्वये जळगाव येथील प्रथम वर्ग न्यायदंडाधिकारी यांच्या न्यायालयात खटला दाखल केला होता.
या प्रकरणाची सुनावणी पूर्ण झाल्यानंतर दि. ७ सप्टेंबर २०२६ रोजी प्रथम वर्ग न्यायदंडाधिकारी श्री. एम. एम. निकम यांनी आरोपीस दोषी धरून एक वर्ष साध्या कैदेची शिक्षा सुनावली. तसेच २ लाख रुपये दंड/नुकसानभरपाई भरण्याचे आदेश दिले आहेत. सदर दंड/नुकसानभरपाईची रक्कम न भरल्यास अतिरिक्त एक महिन्याची साधी कैद भोगावी लागणार आहे.
या निकालामुळे बँकेच्या थकीत कर्जदारांमध्ये खळबळ उडाली असून, कर्जाची परतफेड न करता धनादेश देऊन त्याचा अनादर झाल्यास कायदेशीर कारवाईला सामोरे जावे लागू शकते, असा स्पष्ट संदेश या निकालातून मिळाला आहे.
या प्रकरणात जळगाव जनता सहकारी बँकेतर्फे ॲड. आनंद मुजुमदार यांनी काम पाहिले.
