मुंबई: आपण आपल्या मतदार संघात विकास घडवून आणावा यासाठी आपण लोकप्रतिनिधींना निवडून देतो. पण तुम्ही निवडून दिलेल्या लोकप्रतिनीधींचा पगार किती असतो याबद्दल तुम्हाला कुतुहल असेलच. आमदारांना सरकारकडून किती वेतन मिळते याची माहिती जाणून घेण्यास सर्वजण उत्सुक असतात. हा बऱ्याचादा राजकीय चर्चेचा विषय देखील असतो.
आमदारांना किती वेतन मिळते हा विषय चर्चेला येणे स्वाभाविक आहे. अशातच महाराष्ट्रातील विधानसभा सदस्यांना मिळणारे वेतन किती? या प्रश्नाचे उत्तर एका माहिती अधिकार कार्यकर्त्यांनी मिळविले आहे.
सिंधुदुर्ग जिल्ह्यातल्या सावंतवाडी शहरातील सालईवाडा येथे राहणारे माहिती अधिकार कार्यकर्ते संकेत नेवगी यांनी माहिती अधिकारात माहिती मागवली होती. त्यात आमदारांच्या वेतनाचा आकडा समोर आला आहे.
महाराष्ट्रातील विधानसभा सदस्याला २ लाख ७१ हजार ९४७ रुपये एवढे निव्वळ एकूण वेतन आयकर वजा करून देण्यात येत असल्याची माहिती माहिती अधिकारातून समोर आली आहे. म्हणजेच आमदाराला ३२ लाख रुपयांचं वार्षिक, ५ वर्षांसाठी १,६३,१६,८२०/- रुपये इतकी रक्कम पगार म्हणून मिळते.
आमदाराला मिळणार पगार अन् भत्ता
मूळ वेतन: १,८२,२००/-
महागाई भत्ता ३४%: ६९,९४८/-
दूरध्वनी सुविधा भत्ता: ८०००/-
स्टेशनरी व टपाल सुविधा भत्ता: १०,०००/-
संगणक चालक सेवा मिळण्यासाठी भत्ता: १०,०००/-
एकूण रक्कम : २,७२,१४८/-
व्यवसाय वजाती : २००/-
स्टॅम्प बजाती: १/-
निव्वळ एकूण वेतन: २,७१,९४७/-
