नवी मुंबई,(प्रतिनिधी)- नवी मुंबई मधील घणसोली गावात चिंच आळी येथे कुटुंबासह राहणाऱ्या आईनेच पोटच्या दोनही मुलांचा गळा चिरून हत्या केल्याची धक्कादायक घटना समोर आल्याने खळबळ उडाली आहे, दोनही मुलांची हत्या केल्यानंतर आईने देखील आत्महत्या केल्याचा प्रयत्न केला पण त्यात तिचा जीव वाचला असून तिच्यावर रुग्णालयात उपचार सुरु आहे.
नवी मुंबई मधील घणसोली गावात चिंच आळी येथे ९:३० वाजण्याच्या सुमारास हा प्रकार उघडकीस आला आहे. एका महिलेनं स्वतःच्या दोन अल्पवयीन मुलांची गळा चिरून हत्या केली आहे. मुलांची हत्या केल्यानंतर संबंधित मातेनं स्वतःही हाताची नस कापून आत्महत्येचा प्रयत्न केला. पण ही बाब शेजाऱ्यांच्या निदर्शनास आल्यामुळे महिलेचा जीव वाचला आहे. शेजाऱ्यांनी रबाळे पोलिसांना घटनेची माहिती देताच पोलीस घटनास्थळी दाखल झाले. पुष्पा गुर्जर असं आत्महत्येचा प्रयत्न करणाऱ्या महिलेचं नाव आहे. तर टीपू (वय-४) आणि राहुल (वय-१) असं खून झालेल्या मुलांची नावं आहेत.
गेल्या काही वर्षांपासून हे दाम्पत्य चिंच आळीत राहत होते. ते मूळचे राजस्थानातील असून महिलेचा पती आइस्क्रीम विकण्याचं काम करतो.पोलिसांनी याप्रकरणी गुन्हा दाखल केला आहे.
