मुंबई : शिवसेनेचे खासदार संजय राऊत यांंनी ईडीच्या कारवाईबाबत ईडीला इशारा दिला आहे. ईडीचे अधिकारी आपल्याकडे आल्यास आपण त्याचे स्वागत करू. ईडीच्या अधिकाऱ्याना मी चहा देखील पाजीन. ते माझ्या घरी आल्याने माझी काहीच हरकत नाही. मात्र चुकीची कारवाई केल्यास त्याचे परिणाम त्यांना भोगावे लागतील, असे राऊत यांनी म्हटले आहे.
एखाद्या राजकीय पक्षाला फायदा मिळावा यासाठी जर कारवाई केली गेली, तर त्यांनी हे देखील लक्षात ठेवावे, की मोठे नेते आणि अधिकारी असा खोट्या कारवायांमुळे तुरुंगात गेलेले आहेत. मी कोणालाच सोडणार नाही.असेही ते म्हणाले.
राऊत यांच्या निकटवर्तीयाला अटक
सक्तवसुली संचालनालयाने १ हजार ०३४ कोटी रुपयांच्या जमीन घोटाळ्याच्या आरोपाखाली संजय राऊत यांचे निकटवर्तीय प्रवीण राऊत यांना अटक केली आहे. या प्रकरणी ईडीने सुजीत पाटकर यांच्या घरावर छापा टाकला होता. पाटकर हे संजय राऊत यांच्या मुलींच्या एका कंपनीत भागीदार आहेत. प्रवीण राऊत हे गुरू आशीष कंपनीचे संचालक आहेत. यापूर्वी प्रवीण राऊत यांचे नाव सन २०२० च्या डिसेंबर महिन्यात पीएमसी बँक घोटाळ्याच्या वेळी चर्चेत आले होते.
