वडवणी : तालुक्यातील चिंचोटी येथील एका शेतकऱ्याने शेतातील बोरीच्या झाडाला गळफास घेऊन आत्महत्या केली. बालासाहेब लक्ष्मण गोंडे असे आत्महत्या केलेल्या शेतकऱ्याचे नाव असून आत्महत्यापुर्वी त्यांनी माहेरी असलेल्या लेकीला फोन करून आत्महत्या करत असल्याचे सांगितले.
गोंडे यांची तालुक्यातील पिंपरखेड शिवारातील पांढरी येथे दीड एकर शेती आहे. मंगळवारी रात्री त्यांनी घरातील लोकांना “शेतात चाललो आहे. गोठ्यावरच झोपतो’ असे सांगितले. बुधवारी सकाळी ६ वाजता गोंडे यांनी नादलगाव येथील त्यांच्या सासरी असलेल्या मुलीला फाेन लावला व कर्ज फेडण्यास अापण असमर्थ असल्याचे व्यथित हाेऊन सांगितले व फाेन कट केला. त्यांचे कुटुंबीय शेतात पाेहाेचेपर्यंत गोंडे यांनी गळफास घेतला होता. वडवणी पोलिसांनी शेतात जाऊन घटनास्थळाचा पंचनामा केला आहे. गोंडे यांचा मृतदेह ताब्यात घेऊन तो उत्तरीय तपासणीसाठी वडवणी येथील प्राथमिक आरोग्य केंद्रात पाठवला. त्यांच्या पश्चात पत्नी, आई-वडील, एक अविवाहित मुलगी व दोन विवाहित मुलींसह १० वर्षाचा एक मुलगा आहे.
बाप लेकीच्या फोनमधील संवाद?
“गीतांजली, तुझा बाप खूप कर्जबाजारी झाला आहे. घेतलेले कर्ज ताे फेडू शकत नाही. शेतातील पीकदेखील यंदा आले नाही. संपूर्ण पीक वाया गेले आहे. यामूळे मी खूप असहाय झालो आहे. आता तू सासरहून लवकर नीघ, मी शेतातील झाडालाच गळफास घेऊन आत्महत्या करत आहे…’ असे सासरी असलेल्या लेकीला मोबाइलवर बोलल्यानंतर कर्जबाजारी बाप बालासाहेब गोंडे यांनी शेतातील बोरीच्या झाडाला गळफास घेऊन आत्महत्या केली.
