मुंबई : गेल्या काही दिवसांपासून राज्यात हिंदुत्व आणि हनुमान चालिसा या मुद्द्यांवरुन हाय व्होलटेज ड्रामा सुरु असल्याचं दिसत आहे. अशातच आज महाराष्ट्राचे मुख्यमंत्री आणि शिवसेनेचे पक्षप्रमुख उद्धव ठाकरे यांचं निवासस्थान असलेल्या ‘मातोश्री’समोर अमरावतीच्या खासदार नवनीत राणा आणि त्यांचे पती आमदार रवी राणा हनुमान चालिसा पठण करणार आहेत.
यावरून मुंबईत जोरदार राडा रंगला आहे. नवनीत राणा आणि रवि राणा यांच्या विरोधात शिवसैनिक आक्रमक झाले असून, राणा दाम्पत्याच्या घराबाहेर ठिय्या मांडून आहेत. येथे राणा दाम्पत्याच्या विरोधात घोषणाबाजी करण्यात येत आहे.
या व्हिडीओमध्ये आमदार रवि राणा म्हणत आहेत, “हनुमान आणि प्रभु रामचंद्र यांचा आशीर्वाद घेऊन महाराष्ट्राच्या उन्नतीसाठी, महाराष्ट्राच्या प्रगतीसाठी… ज्या पद्धतीने शेतकरी, शेतमजूर आणि मुख्यमंत्र्यांच्या माध्यमातून महाराष्ट्राला लागलेली शनि, या शनिवारच्या दिवशी, मातोश्री आमचं ह्रदयस्थान आहे. बाळासाहेब ठाकरे आमचं दैवत आहे. त्याठिकाणी जाऊन हनुमान चालीसा वाचणार आहे.”
त्याला हा विरोध होतोय. मला थांबवण्याचा प्रयत्न होतोय. मुख्यमंत्री (CM) सत्तेचा दुरुपयोग करत आहेत. हे बाळासाहेबांच्या विचाराचे शिवसैनिक नाहीत. पोलीस आम्हाला दाखवत आहेत. शिवसैनिकांना आमच्या घराबाहेर आणून आमच्यावर दादागिरी करत आहेत, असा आरोप राणा दाम्पत्यानं केलाय.
