पुणे | प्रतिनिधी –खराडी येथील रेव्ह पार्टी प्रकरणात अटक झाल्यानंतर जेलमध्ये असलेले माजी मंत्री एकनाथ खडसे यांचे जावई प्रांजल खेवलकर यांच्या अडचणींमध्ये आता आणखी भर पडली आहे. एका महिलेने केलेल्या धक्कादायक आरोपांवरून त्यांच्यावर नवीन गुन्हा दाखल करण्यात आला आहे.
सायबर पोलिसांकडे तक्रार
सायबर पोलिसांकडे दाखल केलेल्या तक्रारीनुसार, प्रांजल खेवलकर यांनी महिलेबरोबर संबंध ठेवताना सहमतीशिवाय तिचे आक्षेपार्ह व्हिडीओ आणि फोटो चोरून घेतले. याशिवाय, त्यांचा अयोग्य वापर केल्याचाही आरोप तक्रारीत करण्यात आला आहे. पोलिसांनी तपास सुरू करताना या गुन्ह्याची नोंद केली आहे.
पूर्वीचे आरोप आणि वाद
यापूर्वीही या प्रकरणात मोठा राजकीय वाद रंगला होता. राज्य महिला आयोगाच्या अध्यक्षा रुपाली चाकणकर यांनी खेवलकरांच्या मोबाईलमध्ये अनेक महिलांचे आक्षेपार्ह फोटो आढळल्याचा गंभीर आरोप केला होता. त्यांनी पोलिस महासंचालकांना पत्र पाठवून महिला तस्करीच्या दृष्टीनेही तपास करण्याची मागणी केली होती.
खडसे यांचे प्रत्युत्तर
रुपाली चाकणकर यांच्या आरोपांवर माजी मंत्री एकनाथ खडसे यांनी सार्वजनिकरित्या उत्तर दिले होते. यानंतर राजकीय वातावरण चांगलेच तापले. जळगावमध्ये भाजपकडून खडसे यांच्या विरोधात आंदोलनही झाले होते.
वाद पुन्हा पेटला
नवीन तक्रारीनंतर प्रांजल खेवलकर यांचे नाव पुन्हा चर्चेत आले आहे. परवानगीशिवाय फोटो व व्हिडीओ काढल्याचा महिलेचा ठाम आरोप असून, पोलिसांनी यावरून नवा गुन्हा दाखल केला आहे. यामुळे आधीच गाजत असलेल्या या प्रकरणाला आणखी एक वादग्रस्त कलाटणी मिळाली आहे.
https://x.com/LoksattaLive/status/1956335490568958007?t=99WQXo6kHto7F7bvopCtkg&s=19
