जळगाव : गॅस दरवाढीविरोधात रिक्षाचालकांचा आक्रोश; जिल्हाधिकाऱ्यांना निवेदन

Spread the love

जळगाव (प्रतिनिधी) : जळगाव जिल्ह्यात गॅस दरात सातत्याने होत असलेल्या वाढीमुळे रिक्षाचालकांच्या उदरनिर्वाहावर मोठा परिणाम होत असून, या पार्श्वभूमीवर वीर सावरकर रिक्षा युनियनच्या वतीने जिल्हाधिकाऱ्यांना निवेदन देण्यात आले. जिल्हाध्यक्ष दिलीपभाऊ सपकाळे यांच्या नेतृत्वाखाली हे निवेदन सादर करण्यात आले.
निवेदनात रिक्षाचालकांनी नमूद केले आहे की, गॅस दरात मोठ्या प्रमाणावर वाढ होत असताना शासन त्यांच्या अडचणींकडे दुर्लक्ष करत आहे. सर्व घटक साखळी पद्धतीने जोडलेले असतानाही रिक्षाचालकांना जाणीवपूर्वक वगळले जात असल्याची भावना त्यांनी व्यक्त केली. भाडेवाढ केल्यास प्रवासी आणि प्रशासनाकडून टीका होते, मात्र त्यांच्या अडचणी समजून घेणारा कोणीच नसल्याची खंत त्यांनी व्यक्त केली.

जळगाव : गॅस दरवाढीविरोधात रिक्षाचालकांचा आक्रोश; जिल्हाधिकाऱ्यांना निवेदन

गेल्या काही महिन्यांत गॅस दरात मोठी वाढ झाली आहे. पूर्वी ५३ रुपये प्रति लिटर असलेला दर टप्प्याटप्प्याने ५९, ६५, ८५ रुपयांपर्यंत पोहोचला असून सध्या तो १२५ रुपये प्रति लिटरपर्यंत गेला आहे. युद्धजन्य परिस्थितीचा दाखला देत दरवाढ होत असली तरी गॅस वितरकांवर कोणताही नियंत्रण नसल्याचा आरोप करण्यात आला आहे.

“आम्ही सर्वसामान्य जनतेला सेवा देतो, तरीही आम्हाला परक्या सारखी वागणूक दिली जाते. सरकार आमचे अश्रू पुसण्यासाठी वेळ देत नाही. आमचा प्रपंच कसा चालवायचा, हा मोठा प्रश्न निर्माण झाला आहे. शेतकऱ्यांनंतर आता रिक्षाचालक आत्महत्येच्या उंबरठ्यावर पोहोचतील का?” असा संतप्त सवाल यावेळी उपस्थित करण्यात आला.
तसेच गॅस दरवाढीमुळे केवळ रिक्षाचालकच नव्हे तर त्यांच्या कुटुंबांनाही आर्थिक व मानसिक त्रास सहन करावा लागत असल्याचे नमूद करण्यात आले. या परिस्थितीत शासनाने तातडीने हस्तक्षेप करून दरवाढ नियंत्रणात आणावी, गॅस वितरकांवर कडक कारवाई करावी आणि रिक्षाचालकांना दिलासा द्यावा, अशी मागणी करण्यात आली.

या वेळी वाल्मिक सपकाळे, संजय अडकमोल, रामेश्वर सोनार, भास्कर ठाकूर, सुरज पाटील, शांताराम पाटील, बाळू पाटील, किरण पाटील, संजय चंद्रकांत, दिनकर ठाकरे, निलेश पाटील, रवींद्र कोळी, सागर सोनवणे, अभिजीत बाविस्कर, सुरेंद्र सपकाळे, अमोल तायडे, संजय पाटील, राजेंद्र चौधरी, संभाजी पाटील, संदीप कुमावत, पंकज जाधव यांच्यासह अनेक रिक्षाचालक, वाहनधारक व नागरिक उपस्थित होते.