मुंबई: मुंबईतल्या घाटकोपर भागात धक्कादायक प्रकार समोर आला आहे. ती म्हणजे येथील एका 27 वर्षीय महिलेने आपल्याच पतीला भावाच्या मदतीने मारहाण केली आहे. आश्चर्याची बाब म्हणजे केवळ लग्नाचा वाढदिवस लक्षात राहिला नाही म्हणून भाऊ आणि आई-वडिलांच्या मदतीने या महिलेने पतीला मारहाण केली. हिंदूस्तान टाईम्सने दिलेल्या वृत्तानुसार ही घटना 18 फेब्रुवारीची आहे.
याप्रकरणी चार आरोपींवर मारहाणीचा गुन्हा दाखल करण्यात आल्याची माहिती घाटकोपर पोलीस स्टेशनचे वरिष्ठ निरीक्षक संजय दहाके यांनी दिली. पोलिसांनी आरोपींना नोटीस बजावली असून याप्रकरणी चौकशीनंतर कायदेशीर कारवाई केली जाईल.
पोलिसांच्या माहितीनुसार 32 वर्षांचा पीडित विशाल नांगरे कुरियर कंपनीत ड्रायव्हर आहे, तर पत्नी कल्पना फूड आऊटलेटमध्ये काम करते. हे दोघं बैगनवाडी गोवंडीमध्ये राहतात, तसंच दोघांचं लग्न 2018 साली झालं आहे.
कल्पनाचे आई-वडील आणि भाऊ चर्चा करण्यासाठी तिच्या सासूच्या घरी आले होते, यावेळी रात्री 9.30 च्या सुमारास कल्पनाने तिच्या सासूच्या कानशिलात लगावली. यानंतर वाद वाढला आणि दोघांना मारपीट करण्यात आली. घडलेल्या प्रकारानंतर नांगरे आणि त्यांची आई राजावाडी हॉस्पिटलमध्ये गेले. मेडिकल रिपोर्ट मिळाल्यानंतर त्यांनी घाटकोपर पोलिसांना संपर्क केला. पत्नीच्या भावाने आपल्या हाताचा आणि चेहऱ्याचा चावा घेतल्याचा आरोपही पतीने केला आहे.
