नाशिक – राज्याचे लक्ष लागून असलेल्या नाशिक महापालिकेच्या निवडणुकीत अखेर भाजपने बाजी मारली आहे. मनसेनं भाजपसोबत जाण्याचा निर्णय आणि काँग्रेसनं सत्तेचा धरलेला हट्ट यामुळं जमून आलेल्या शिवसेनेचे गणित ऐनवेळी बिघडल्यानं भाजपच्या महापौर पदाचा मार्ग मोकळा झाला. भाजपचे १० नगरसेवक शिवसेनेनं फोडल्यामुळं भाजपचे गणित बिघडले होते. माजी आमदार बाळासाहेब सानप समर्थक या नगरसेवकांनी भाजपच्या तंबूत जाण्यास नकार दिल्यानं बहुमतातील भाजपची सत्ता संकटात सापडली होती.
शिवसेना , राष्ट्रवादी ,काँग्रेस या महाशिवाघाडीनं सत्तेचे गणित जमवले होते. परंतु ऐनवेळी काँग्रेसनं सत्तेचा आग्रह धरला.काँग्रेसनं उपमहापौर पदाचा आग्रह धरल्यानं भाजपच्या फुटीर गटाला उपमहापौर पद देनं शिवसेनेला अवघड बनलं होतं.भाजपनं काँग्रेसचे नगरसेवक गळाला लावल्यामुळं आणि मनसेने भाजपसोबत जाण्याचा निर्णय घेतल्यानं भाजपच्या फुटीर नगरसेवकांनी भाजपच्या तंबूत परतण्याचा निर्णय घेतला.त्यामुळं बहुमतासाठी आवश्यक असलेला ६१ चा आकडा भाजपनं गाठला आणि शिवसेनेची अखेरच्या क्षणी कोंडी झाली.त्यामुळं अखेर भाजपच्या महापौर आणि उपमहापौर पदावरील विजयाचा मार्ग सुकर झाला. भाजपला सत्ता राखण्यास यश आलं.
नाशिक महापौरपदाच्या निवडणुकीत माजी पालकमंत्री गिरीश महाजन यांनी प्रतिष्ठा पणाला लागली होती.माजी आमदार बाळासाहेब सानप यांनी भाजपचे १० नगरसेवक फोडले होते.त्यामुळे भाजपची सत्ता धोक्यात आली होती.परंतु महाजन ऐनवेळी पुन्हा भाजपचे संकटंमोचक ठरले आहेत.काँग्रेस आणि मनसेला हाताशी धरून त्यांनी भाजपची सत्ता राखल्यानं ते संकटमोचक असल्याचे सिद्ध केलं आहे.
