नवी मुंबई : महिलांसह लहान मुलींवर होणारे अत्याचाराच्या घटना दिवसेंदिवस वाढतच आहे. अशातच आणखी एक धक्कादायक घटना समोर आलीय. AC रिपेअरिंग करायला आलेल्या व्यक्तीने पाच वर्षीय मुलीवर इमारतीच्या लिफ्टमध्येच लैंगिक अत्याचार केल्याची संतापजनक घटना घडली.
ही घटना नवी मुंबईतील तळोजा पोलीस ठाण्याच्या हद्दीत फेज एकमधील एका इमारतीमधील आहे. अख्तर हुसेन असे संशयित नराधमाचे नाव असून याप्रकरणी पोलिसांनी त्याला ताब्यात घेतलं आहे.
अख्तर हुसेन हा एसी रिपेअरिंगचे काम करतो. तो संध्याकाळी 7 ते 8 च्या दरम्यान इमारतीत आला होता. एका रूममधून तो एसी रिपेअरिंग करून लिफ्टमधून खाली आला. यावेळी त्याला पार्किंगमध्ये एक पाच वर्षीय मुलगी खेळताना दिसली. आजूबाजूला कोणीच नाही हे पाहून आणि मुख्य म्हणजे त्यावेळी सुरक्षा रक्षकही हजर नसल्याचं लक्षात आल्यावर त्याने याचा फायदा घेतला. या व्यक्तीने त्या मुलीला लिफ्टमध्ये नेलं आणि तिच्यावर लिफ्टमध्येच जबरदस्ती करून लैंगिक अत्याचार केले.
लिफ्ट तिसऱ्या मजल्यावर पोहचल्यावर त्याने मुलीला सोडून दिलं. ती घरात जाऊन उलटी करत असताना आईला तिने सर्व प्रकार सांगितला. लगेचच आई वडील खाली आले. यावेळी मुलीने आरोपी पळून जात असताना ओळखले आणि हाच तो असल्याचं सांगितलं. वडील आणि सुरक्षा रक्षकाने त्याला पकडून पोलिसांच्या ताब्यात दिलं. पोलिसांनी कसून चौकशी केली असता त्याने घडलेला सर्व प्रकार सांगितला. त्याच्याविरोधात बलात्कार आणि पोक्सो अंतर्गत गुन्हा दाखल केला असून आरोपीला अटक करण्यात आली आहे.