मुंबई – शिवसेनेचे १७ आमदार नाराज असून त्यांनी शिवसेना पक्षप्रमुख उद्धव ठाकरे यांना भेटून जाहीर नाराजी व्यक्त केल्याच्या वृत्ताचं शिवसेना विधिमंडळ गटनेते एकनाथ शिंदे यांनी खंडन केलं आहे. शिवसेनेत कोणीही नाराज नाही. लोकांमध्ये संभ्रम निर्माण करणारी ही बातमी आहे. त्यावर कुणीही विश्वास ठेवू नये, असं एकनाथ शिंदे यांनी सांगितलं.
हिंदुत्वाच्या मुद्द्यावर शिवसेनेचे १७ आमदार नाराज असून या आमदारांनी शिवसेना नेते मनोहर जोशी यांच्यासोबत ‘मातोश्री’वर जाऊन त्यांची नाराजी व्यक्त केल्याची बातमी आली होती. त्यामुळे शिवसेनेच्या आमदारांमध्ये खळबळ उडाली होती. या पार्श्वभूमीवर एकनाथ शिंदे यांनी मातोश्रीवर जाऊन उद्धव ठाकरे यांनी भेट घेऊन चर्चा केली. त्यानंतर त्यांनी या वृत्ताचं खंडन केलं. शिवसेनेचे आमदार नाराज असल्याचं वृत्त खोटं आहे. लोकांमध्ये संभ्रम निर्माण करणारी ही बातमी आहे. सत्तास्थापनेचा सर्व अधिकार उद्धव ठाकरे यांनाच देण्यात आलेला आहे. ते राज्याच्या आणि पक्षाच्या हिताचाच निर्णय घेतील. त्यामुळे नाराज असण्याचा प्रश्नच उद्भवत नाही, असं शिंदे म्हणाले.
आम्ही शिवसेना या चार अक्षरामुळे निवडून आलो आहोत. शिवसैनिकांच्या परिश्रमामुळे आम्ही आमदार झालो आहोत, याची आम्हाला जाणीव आहे. आमचा पक्ष हा शिस्तीवर आणि आदेशावर चालणारा पक्ष आहे. आमच्या पक्षात उद्धव ठाकरे यांचा शब्द अंतिम शब्द असतो. त्यामुळे उद्धव ठाकरे हे राज्याचं हित लक्षात घेऊनच निर्णय घेतील, असंही त्यांनी सांगितलं. शिंदे यांनी प्रसारमाध्यमांसमोर थेट न येता एक व्हिडिओ व्हायरल करून या वृत्ताचं खंडन केलं आहे.
