मुंबई: भाजप-शिवसेनेतील बेबनावामुळं महाराष्ट्राच्या राजकारणानं अनपेक्षित वळण घेतलं आहे. गेल्या अनेक वर्षांपासून राजकीय विरोधक म्हणून एकमेकांना पाण्यात पाहणारे काँग्रेस-राष्ट्रवादी व शिवसेनेचे नेते मनाने जवळ आले आहेत. इतकेच नव्हे, हे नेते एकमेकांच्या मांडीला मांडी लावून बैठका घेऊ लागले आहेत. त्यांच्यातील या जवळीकीमुळं राज्यात नव्या सरकारच्या स्थापनेची शक्यता बळावली आहे.
विधानसभा निवडणुकीचा निकाल लागल्यानंतर राज्यातील राजकीय परिस्थिती पूर्णपणे बदलली आहे. सत्तावाटपावरून युतीतील वाद चिघळल्यानं शिवसेनेनं भाजपला वगळून आपला मुख्यमंत्री बनविण्यासाठी कंबर कसली आहे. त्यासाठी परंपरागत प्रतिस्पर्धी असलेल्या काँग्रेस-राष्ट्रवादीशी बोलणी सुरू केली आहे. या निमित्तानं दोन्ही बाजूचे नेते एकमेकांच्या भेटीगाठी घेऊ लागले आहेत. एकमेकांवर स्तुतीसुमनं उधळू लागले आहेत.
काँग्रेस नेत्यांनी आज घेतलेल्या संजय राऊत यांच्या भेटीच्या निमित्तानं याची प्रचिती आली. शिवसेनेच्या वतीनं गेल्या काही दिवसांपासून किल्ला लढवणारे राऊत हे सध्या लीलावती रुग्णालयात उपचार घेत आहेत. त्यांच्या प्रकृतीची विचारपूस करण्यासाठी काँग्रेस नेते अशोक चव्हाण, बाळासाहेब थोरात व माणिकराव ठाकरे यांनी आज त्यांची भेट घेतली. यावेळी चव्हाण यांनी राऊत यांचं कौतुक केलं. राऊत यांच्या भेटीनंतर त्यांनी थेट उद्धव ठाकरे यांची भेट घेऊन चर्चा केली. या साऱ्या घडामोडीमुळं तिन्ही पक्षातील नेत्यांच्या मनोमिलनाची जोरदार चर्चा आहे.
असे आहे पक्षीय बलाबल
राज्यात विधानसभा निवडणुकीचे निकाल लागले असून भाजपला सर्वाधिक १०५ जागा जिंकता आल्या आहेत. तर शिवसेनेला ५६ जागा मिळाल्या आहेत. राष्ट्रवादीने या निवडणुकीत ५४ आणि काँग्रेसने ४४ जागा जिंकल्या आहेत. बहुजन विकास आघाडीला ३, एमआयएमला, समाजवादी पार्टीला आणि प्रहार जनशक्ती पार्टीला प्रत्येकी दोन जागा मिळाल्या आहेत. त्याशिवाय माकप, जनसुराज्य शक्ती, क्रांतिकारी शेतकरी पार्टी, शेकाप, मनसे, रासपला प्रत्येकी एका जागेवर विजय मिळविता आला आहे. या निवडणुकीत एकूण १३ अपक्षही निवडून आले आहेत.
