नवी दिल्ली: देशात आर्थिक मंदी असल्याचं या क्षेत्रातील अनेक तज्ज्ञांनी मत व्यक्त केलं असतानाच, रिलायन्स इंडस्ट्रीजचे अध्यक्ष मुकेश अंबानी यांनीही भारतीय अर्थव्यवस्थेत मंदी असल्याचं म्हटलं आहे. मात्र त्यांनी ही परिस्थिती तात्पुरती असल्याचं सांगतानाच, सरकारने अलीकडेच उचललेल्या पावलांमुळं पुढील तिमाहीत अर्थव्यवस्थेत तेजी येईल, असा विश्वासही त्यांनी व्यक्त केला आहे.
सौदी अरेबियातील रियाधमध्ये ’फ्युचर इन्व्हेस्टमेंट इनिशिएटीव्ह’मध्ये उपस्थितांना संबोधित करताना मुकेश अंबानी यांनी भारतीय अर्थव्यवस्था सुस्तावलेली असल्याचं म्हटलं आहे. देशातील अर्थिक क्षेत्रात तात्पुरत्या स्वरुपाची मंदी आहे. मात्र, सरकारने अलीकडेच जी पावलं उचलली आहेत, त्यामुळं पुढील तिमाहीत अर्थव्यवस्थेत पुन्हा तेजी येईल, असा विश्वासही त्यांनी व्यक्त केला आहे.
29 ऑक्टोबर ते 31 ऑक्टोबरपर्यंत रियाधमध्ये आयोजित या कार्यक्रमात पंतप्रधान नरेंद्र मोदीही उपस्थित होते. यात मुकेश अंबानी यांच्यासह भारतातील अनेक दिग्गज उद्योगपती उपस्थित होते. मुकेश अंबानी यांनी मंगळवारी या कार्यक्रमातील उपस्थितांना संबोधित केले. ’भारतीय अर्थव्यवस्थेत थोडी मंदी निश्चितच आहे. मात्र ती तात्पुरत्या स्वरुपाची आहे असं मला वाटतं. गेल्या काही महिन्यांत सरकारने सुधारणा घडवून आणण्यासाठी उपाययोजना केल्या आहेत. त्याचा सकारात्मक परिणाम नक्कीच होईल. पुढील तिमाहीत परिस्थिती संपूर्णपणे बदलेल,’ असे अंबानी यावेळी म्हणाले.
यावेळी अंबानी यांनी पंतप्रधान नरेंद्र मोदी, सौदीचे किंग सलमान बिन अब्दुल अजीज अल सऊद आणि त्यांचे पुत्र प्रिन्स मोहम्मद बिन सलमान बिन अब्दुल अजीज यांच्या हवाल्यानं सांगितलं की, ’या नेत्यांचं नेतृत्व गती देणारे आहे. दोन्ही देशांचं नेतृत्व जगात सर्वोत्कृष्ट आहे. सौदी अरेबियाने गेल्या दोन तीन वर्षांत जबरदस्त बदल पाहिले आहेत.’ भारताच्या विकास दरात गेल्या पाच महिन्यांपासून घट झाल्याचं पाहायला मिळत आहे. एप्रिल-जून या तिमाहीत विकास दर पाच टक्क्यांपर्यंत आला आहे. वर्षभरापूर्वी तो आठ टक्क्यांपर्यंत होता. हा 2013 नंतरचा सर्वात कमी दर आहे, याकडेही त्यांनी लक्ष वेधले.
दरम्यान, सरकारने अर्थव्यवस्थेला गती देण्यासाठी अलीकडेच ठोस पावले उचलली आहेत. अर्थमंत्री निर्मला सीतारामन यांनी अनेक घोषणा केल्या आहेत. कंपनी करात घट केल्याची घोषणा केली आहे, तसंच अनेक सरचार्ज हटवण्याचा निर्णय घेतला आहे. गैरबँकिंग वित्तीय कंपन्यांची परिस्थिती सुधारण्यासाठी प्रयत्न केले गेले आहेत.
