मुंबई: शिवसेना आणि भाजप यांच्यात सत्ता स्पर्धा तीव्र होत असताना दबाबावाचे राजकारण दोन्ही बाजूंनी सुरू झाले आहे. शिवसेनेचे ४५ आमदार आमच्या संपर्कात असून भाजपसोबत युतीचे सरकार स्थापन व्हावे अशी त्यांची इच्छा असल्याचा गौप्यस्फोट भाजप खासदार यांनी केला आहे.
एका वृत्तवाहिनीसोबत बोलताना खासदार संजय काकडे यांनी हा दावा केला आहे. संजय काकडे यांनी सांगितले की, राज्यात शिवसेना-भाजप महायुतीचे सरकार यावे अशी अनेकांची इच्छा आहे. त्यातही शिवसेनेचे आमदार आग्रही असल्याचे काकडे यांनी सांगितले. काहीही झाले तरी आम्ही भाजपसोबत सरकारमध्ये सहभागी होवू इच्छितो, असे शिवसेनेच्या ४५ आमदारांनी आपले मत व्यक्त केले असून ते आमच्या संपर्कात असल्याचे काकडे यांनी सांगितले. खासदार संजय काकडे यांचे वक्तव्य हे शिवसेनेवर दबाब वाढवण्यासाठीचे असल्याचे मत जाणकार व्यक्त करत आहेत.
नुकत्याच पार पडलेल्या विधानसभा निवडणुकीत भाजप सर्वाधिक जागा जिंकून मोठा पक्ष झाला आहे. तर, शिवसेनेला ५६ जागा मिळाल्या आहेत. तर विरोधी पक्ष असलेल्या काँग्रेस-राष्ट्रवादी काँग्रेसच्या मिळून १०० हून अधिक जागा आल्या आहेत. विधानसभा निवडणूक निकालानंतर शिवसेना ५०-५० फॉर्म्युल्यावर ठाम असल्याचे शिवसेना पक्षप्रमुख उद्धव ठाकरे यांनी स्पष्ट केले होते. त्यानंतर शिवसेना अडीच वर्षासाठी मुख्यमंत्रीपदासाठी आग्रही असल्याच्या चर्चा सुरू झाल्या आहेत. शिवसेना आमदारांनीही सत्तेत समसमान वाटा असावा अशी भूमिका घेतली असल्याची माहिती सूत्रांनी दिली. तर, शिवसेना आणि भाजपकडून अपक्षांना आपल्या बाजूने वळवण्यासाठी जोरदार रस्सीखेच सुरू आहे. त्या पार्श्वभूमीवर काकडे यांच्या वक्तव्यामुळे राजकीय वर्तुळात चर्चा सुरू झाल्या आहेत.
