नवी दिल्ली : जर तुम्ही एलआयसी पॉलिसी घेतली असेल, तर ही बातमी तुमच्यासाठी खूप महत्त्वाची आहे. देशातील एलआयसी पॉलिसीधारकांची संख्या मोठी आहे. त्यामुळे आपल्या ग्राहकांना विविध सुविधांचा लाभ मिळावा, यासाठी एलआयसी वेगवेगळी पावले उचलत आहे. अशात पॉलिसीधारकांना त्यांचे पॅन कार्ड पॉलिसीशी जोडणे आवश्यक आहे. याबाबतची सविस्तर माहिती एलआयसीने आपल्या अधिकृत संकेतस्थळावरूनही प्रसिद्ध केली आहे.
सरकारने पॅन आणि आधार लिंक करण्याची अंतिम तारीख ३१ मार्च २०२२ पर्यंत वाढवली आहे.बाजार नियामक सेबीनेही अशाच प्रकारचा नियम निश्चित केला आहे आणि गुंतवणूकदारांना त्यांचे पॅन आधारशी जोडण्यास सांगितले आहे. त्याचप्रमाणे एलआयसीला पॅन लिंक करण्यास सांगितले आहे.
जर तुम्ही अजूनही पॉलिसी पॅनशी जोडलेली नसेल, तर काळजी करू नका. आता तुम्ही ते घरबसल्या ऑनलाईन करू शकता. याबाबत सविस्तर जाणून घेऊया : –
१. एलआयसीच्या साइटवर पॉलिसींच्या सूचीसह पॅनचा तपशील द्या.
२. आता तुमचा मोबाईल नंबर प्रविष्ट करा. त्या मोबाइल क्रमांकावर एलआयसी (LIC) कडून एक ओटीपी (OTP) येईल, तो प्रविष्ट करा.
३. फॉर्म जमा केल्यानंतर, तुम्हाला यशस्वी नोंदणीचा संदेश मिळेल.
४. आता तुम्हाला कळेल की, तुमचे पॅन पॉलिसीशी जोडले गेले आहे.
घरी बसून अशी तपासा पॉलिसीची स्थिती :-
१. एलआयसी पॉलिसीची ऑनलाइन स्थिती जाणून घेण्यासाठी तुम्हाला आधी https://www.licindia.in/ या अधिकृत वेबसाइटवर जावे लागेल. पॉलिसीची सद्यस्थिती जाणून घेण्यासाठी तुम्हाला येथे नोंदणी करावी लागेल.
२. नोंदणीसाठी तुम्हाला कोणत्याही प्रकारचे शुल्क भरावे लागणार नाही. यासाठी तुम्हाला तुमची जन्मतारीख, नाव, पॉलिसी क्रमांक दिलेल्या रकान्यात भरावा लागेल. एकदा नोंदणी केल्यानंतर, तुम्ही तुमची स्थिती कधीही तपासू शकता.
३. तुम्हाला काही माहिती हवी असेल, तर तुम्ही ०२२ ६८२७ ६८२७ वर देखील कॉल करू शकता. या व्यतिरिक्त, तुम्ही ९२२२४९२२२४ या क्रमांकावर LICHELP <policy number> असे लिहून संदेश पाठवू शकता. यावेळी संदेश पाठवण्यासाठी तुमचे पैसे कापले जाणार नाहीत.
SMS द्वारे माहिती कशी मिळवायची :-
१. तुम्ही मोबाईल वरून एसएमएस पाठवून पॉलिसीच्या स्थितीबद्दल माहिती मिळवू शकता. यासाठी तुम्हाला ५६६७७ वर एसएमएस पाठवावा लागेल.
२. जर तुम्हाला पॉलिसीचा प्रीमियम जाणून घ्यायचा असेल, तर तुम्ही ASKLIC PREMIUM टाइप करून ५६६७७ या क्रमांकावर SMS पाठवू शकता.
३. जर पॉलिसी संपली असेल, तर ASKLIC REVIVAL टाइप करून SMS करावा लागेल.
