मुंबई : 1 सप्टेंबरपासून म्हणजेच आजपासून सुरुवातीला देशात अनेक महत्त्वपूर्ण बदल होणार आहेत. एकीकडे तुम्हाला या नवीन नियमांपासून दिलासा मिळेल, तर दुसरीकडे तुम्ही काही गोष्टींची काळजी घेतली नाही तर तुम्हाला आर्थिक नुकसानही होऊ शकते. या नियमांमधील बदलांचा तुमच्या खिशावर परिणाम होईल. याचा तुमच्या घरगुती बजेटवरही परिणाम होईल. म्हणूनच त्यांच्याबद्दल जाणून घेणे आपल्यासाठी खूप महत्वाचे आहे. या बदलांमध्ये एलपीजी सिलिंडरची किंमत, पीएनबी बचत खात्यांमध्ये मिळालेले व्याज, पीएफ नियम, मारुती कार, अॅक्सिस बँक चेक पेमेंट नियम, आदींचा समावेश आहे.
१. एलपीजी स्वयंपाकाच्या गॅसची किंमत :
सप्टेंबर महिन्यात ईएलपीजी स्वयंपाकाच्या गॅसच्या किमतीतही बदल होईल. भूतकाळातील ट्रेंड पाहता, एलपीजीच्या किमतीत घट होण्याची शक्यता कमी आणि वाढण्याची शक्यता जास्त आहे. जुलै महिन्यापासून प्रत्येक महिन्यात एलपीजी सिलिंडरच्या किमतीत वाढ होताना दिसत आहे. या अर्थाने, असे मानले जाते की, सप्टेंबरमध्ये देखील किमती वाढू शकतात. घरगुती स्वयंपाकाच्या गॅस एलपीजीच्या किमतीत 18 ऑगस्टला 25 रुपये प्रति सिलिंडर वाढ करण्यात आली होती, जी सलग दुसऱ्या महिन्यात सरळ वाढ होती. तेल कंपन्यांच्या किमतीच्या अधिसूचनेनुसार, अनुदानित एलपीजी सिलिंडरची किंमत आता दिल्लीमध्ये प्रति 14.2 किलो सिलिंडरसाठी 859 रुपये आहे. भाववाढीचा हा सलग दुसरा महिना आहे. यापूर्वी 1 जुलै रोजी प्रति सिलिंडर 25.50 रुपयांची वाढ करण्यात आली होती.
२. आधार-पीएफ लिंकिंग :
ज्याप्रमाणे आधार आणि पॅन लिंक करणे अनिवार्य केले जात आहे, त्याचप्रमाणे पीएफ खाते आधारशी जोडणे आवश्यक झालेय. हे काम सप्टेंबर महिन्यात करायचे आहे. जर पीएफचे यूएन आणि आधार कार्ड क्रमांक जोडलेले नाहीत, तर तुमची कंपनी तुमच्या पीएफ खात्यात पैसे जमा करू शकणार नाही. हा नियम लागू करण्यासाठी EPFO ने अलीकडेच सामाजिक सुरक्षा संहितेच्या कलम 142 मध्ये बदल केलाय. जर एखाद्या काम करणाऱ्या व्यक्तीला त्याच्या सेवानिवृत्ती निधीचा आनंद घ्यायचा असेल तर त्याने सप्टेंबर महिन्यात पीएफ खाते आधारशी लिंक करावे. अन्यथा काम केल्यानंतरही तुम्ही पीएफ खात्यात पैसे जमा करू शकणार नाही.
३. PNB च्या सेव्हिंग अकाऊंटवरील व्याज घटणार
पंजाब नॅशनल बँकेच्या (PNB) ग्राहकांना पुढच्या महिन्यात जोरदार धक्का बसण्याची शक्यता आहे. कारण पंजाब नॅशनल बँक 1 सप्टेंबर 2021 पासून बचत खात्यामध्ये जमा होणाऱ्या व्याजामध्ये कपात करण्याची शक्यता आहे. ही माहिती बँकेच्या अधिकृत संकेतस्थळावरून देण्यात आली आहे. बँकेने बचत खात्यावरील व्याजदर वार्षिक 3 टक्क्यांवरून घटवून 2.90 टक्के केला आहे. या निर्णयाचा परिणाम नव्या आणि जुन्या अशा दोन्ही ग्राहकांवर होणार आहे.
४. चेक क्लिअरिंगचा नियम बदलणार
जर तुम्ही चेकच्या माध्यमातून पैसे पाठवत असाल किंवा चेक पेमेंट करत असाल तर तुमच्यासाठी महत्त्वाची बातमी आहे. आता 1 सप्टेंबरपासून 50 हजार रुपयांपेक्षा अधिकचा चेक जारी करणे तुमच्यासाठी काहीसे त्रासदायक ठरण्याची शक्यता आहे. कारण बँकांनी आता पॉझिटिव्ह पे सिस्टिम (positive pay system) लागू करण्यास सुरुवात केली आहे. अॅक्सिस बॅक (Axis Bank) या महिन्यापासून पॉझिटिव्ह पे सिस्टिम लागू करणार आहे.
५. OTT प्लॅटफॉर्मचे सब्स्क्रिप्शन महागणार
1 सप्टेंबरपासून भारतामध्ये ओटीटी प्लॅटफॉर्म डिस्नी प्लस हॉटस्टारचे (Disney plus hotstar) सब्स्क्रिप्शन महाग होणार आहे. युझर्सला या सब्स्क्रिप्शनच्या बेस प्लॅनसाठी 399 रुपयांऐवजी 499 रुपये मोजावे लागणार आहेत. याचाच अर्थ युझर्सला 100 रुपये अतिरिक्त द्यावे लागतील. तर 899 रुपयांमध्ये ग्राहकांना दोन फोनमध्ये अॅप सुरू करता येईल. तसेच, या सब्स्क्रिप्शन प्लॅनमध्ये HD क्वालिटी मिळेल. 1,499 रुपयांमध्ये 4 स्क्रीनवर हे अॅप चालवता येईल.
६. अॅमेझॉन लॉजिस्टिक कॉस्टमध्ये वाढ
1 सप्टेंबरपासून अॅमेझॉनवरून सामान मागवणे महागणार आहे. कंपनी डिझेल आणि पेट्रोलच्या किमतींमध्ये वाढ झाल्याने लॉजिस्टिक कॉस्टमध्ये वाढ करू शकते. अशा परिस्थितीत 500 ग्रॅमच्या पॅकेजसाठी 58 रुपये द्यावे लागतील. रीजनल कॉस्ट 36.50 रुपये असेल.
७. गुगलचे नवे धोरण, अनेक अॅप्सवर निर्बंध
गुगलचे नवे धोरण 1 सप्टेंबरपासून लागू होणार आहे. त्याअंतर्गत चुकीच्या आणि बनावट कंटेंटला प्रमोट करणाऱ्या अॅपवर 1 सप्टेंबरपासून निर्बंध लागू होती. गुगलने आपल्या पोस्टमध्ये सांगितले की, अॅप डेव्हलपर्सकडून दीर्घकाळापर्यंत वापरण्यात न आलेल्या अॅप्सना ब्लॉक करण्यात येईल. गुगलकडून गुगल प्ले स्टोअर्सच्या नियमांना आधीपेक्षा अधिक कठोर बनवण्यात येत आहे. तसेच गुगल युझर्सला पुढच्या 13 सप्टेंबरला नवा सिक्युरिटी अपडेट मिळेल. त्यामधून गुगल ड्राईव्हचा वापर आधीच्या पेक्षा अधिक सुरक्षित होणार आहे.
