प्राईम पॉइंट फाऊंडेशन व प्रिसेन्स ई-मॅगझिन यांच्या वतीने खासदार सुप्रियाताई सुळे यांना १६ व्या लोकसभेतील सर्वोत्कृष्ट कामगिरीबद्दल ‘संसद महारत्न’ व १७ व्या लोकसभेतील कामगिरीबद्दल ‘संसदरत्न’ पुरस्कार मिळाला असून त्यांनी हे दोन्हीही पुरस्कार निवडून दिलेल्या बारामती लोकसभा मतदार संघातील मतदारांना नम्रपणे अर्पण केला आहे.
दिल्ली येथील कॉन्स्टिट्यूट क्लब सभागृहात दिनांक 21 मार्च रोजी संसद महारत्न व संसद रत्न या दोन्ही पुरस्काराचे वितरण करण्यात आले असून पुर्वनियोजित कार्यक्रमांमुळे खासदार सुप्रिया सुळे यांना उपस्थित राहता आले नाही.केंद्रीय राज्यमंत्री अर्जुन राम मेघवाल,मुख्य निवडणूक आयुक्त सुनील अरोरा आणि सर्वोच्च न्यायालयाचे निवृत्त न्यायमूर्ती ए. के. पटनायक यांच्या प्रमुख उपस्थितीत हे पुरस्कार प्रदान करण्यात आले.
पुरस्कार मिळाल्यानंतर खासदार सुप्रियाताई सुळे यांनी बारामती लोकसभा मतदार संघातील मतदारांसाठी ट्विट केलं असून त्यात त्यांनी म्हटलं आहे की, आपण सर्वांनी माझ्यावर विश्वास टाकत मला सातत्याने आपल्या बारामती लोकसभा मतदारसंघाचे प्रतिनिधित्व करण्याची संधी दिली.प्रांजळपणाने नमूद करावेसे वाटते की, आपला विश्वास हीच माझ्यासाठी खरी उर्जा आहे.यामुळेच जनहिताच्या मुद्यांना संसदेत मांडता आलं.
लोकसभेतील विविध चर्चांमध्ये भाग घेऊन सर्वसामान्यांचा आवाज संसदेत पोहोचविण्याचं बळ लाभतं.म्हणूनच हे दोन्ही पुरस्कार केवळ माझे एकटीचे नाहीत तर आपल्या बारामती लोकसभा मतदारसंघातील प्रत्येकाचे आहेत.हे दोन्ही पुरस्कार अतिशय नम्रपणे आपणास अर्पण करते.
