मुंबई,(प्रतिनिधी)- राष्ट्रवादी काँग्रेस पक्षात फूट पडल्यानंतर अजितदादा पवार यांनी भाजपा आणि शिंदे सरकार सोबत जात उपमुख्यमंत्री पदाची शपथ घेऊन सरकारमध्ये सामील झाले दरम्यान भाजपा व शिंदे यांच्याकडे स्पष्ट बहुमत असतांना अजितदादा यांना सोबत घेण्यात आल्याने अनेक राजकीय नेत्यांच्या मनात प्रश्न निर्माण झाला खरं मात्र लगेचचं अजित पवार लवकरच मुख्यमंत्री होतील, असे दावे राष्ट्रवादीच्या काही आमदारांकडून वारंवार करण्यात आल्याने अजितदादा सत्तेत सहभागी झाले असतील असे अनेकांना वाटत असतांना अजितदादा मुख्यमंत्री होणार नाही असा दावा छत्रपती संभाजीराजे यांनी मुंबईत केला आहे.
अजितदादा पवार यांच्या मुख्यमंत्री होण्याच्या दाव्यांवर चर्चा होत असतानाच आता स्वराज्य संघटनेचे संस्थापक छत्रपती संभाजीराजे यांनी मोठा दावा केला आहे. अजित पवार हे मुख्यमंत्री होणार नाहीत, असा दावा छत्रपती संभाजीराजे यांनी केला आहे. संभाजीराजे रविवारी मुंबईत आले होते. यावेळी त्यांनी माध्यमांसोबत संवाद साधला.
नेमकं काय म्हणाले संभाजीराजे छत्रपती
मी चॅलेंज देऊन सांगतो, की अजित पवार (Ajit Pawar) मुख्यमंत्री होणार नाहीत. राष्ट्रवादीचे सर्व आमदार शरद पवारांकडे परततील, हा सर्व ठरवून झालेला प्लान आहे, असं संभाजीराजे यांनी म्हटलं आहे. मुख्यमंत्रिपदी एकनाथ शिंदे हेच राहणार. अजित पवार यांना मुख्यमंत्री केले जाणार नाही. हे केवळ लोकसभा निवडणुकांसाठी जुळविलेले गणित आहे, असंही ते म्हणाले.
त्यांच्या या विधानाची चर्चा रंगली असतानाच दुसरीकडे राष्ट्रवादीचे सर्वेसर्वा शरद पवार यांनी देखील अशाच प्रकारचं विधान केलं. यामुळे महाविकास आघाडीतील नेत्यांमध्ये नाराजी दिसून आली होती. यानंतर शरद पवार यांनी तातडीने पत्रकार परिषद घेत आपण असं बोललो नाही, असं स्पष्ट केलं होतं.
