पंढरपूर – शिवसेनेने शिवभोजन थाळी सुरू केल्यानंतर आता भाजपने त्याला उत्तर म्हणून दीनदयाळ थाळी सुरू केली आहे. पंढपुरातून दीनदयाळ थाळीला सुरुवात केली आहे. अवघ्या ३० रुपयांत ही थाळी दिली जात आहे.
पंढपुरातील काही महिलांनी श्री महिला उद्योग या संस्थेची स्थापना केली होती. या महिलांनी शेंगदाणा लाडू, पापड आणि इतर खाद्यपदार्थ बनवून विकण्यास सुरुवात केली होती. भाजपने या महिलांनासोबत घेऊन दीनदयाळ थाळी सुरू केली आहे. श्री विठ्ठल मंदिरापासून ५ मिनिटांच्या अंतरावर इंदिरा गांधी भाजी मार्केट जवळ या योजनेस आजपासून शुभारंभ झाला. ३ चपाती, १ भाताची मुद , १ वाटी भाजी, १ वाटी आमटी, १ वाटी ताक, लिंबू फोड, शेंग चटणी, लोणचे, पापड असे १० पदार्थ देण्यात येत आहेत. या थाळीची किंमत ३० रुपये आहे. दुपारी १२ ते १ या एक तासाच्या वेळेतच ही थाळी सर्वांना दिली जात आहे. विशेष म्हणजे पंढरपूरला विठ्ठलाच्या दर्शनासाठी येणारे भाविक या थाळीचा लाभ घेत असून तासाभरात सुमारे ५०० भाविक या थाळीचा लाभ घेतील असं भाजपने सांगितलं. पंडित दीनदयाळ उपाध्याय यांच्या जयंतीचं औचित्य साधून राज्याचे माजी सहकार मंत्री सुभाष देशमुख यांच्या हस्ते या थाळीची सुरुवात झाली. भाजपचे शहराध्यक्ष संजय वाईकर यांच्या पुढाकाराने ही थाळी सुरू करण्यात आली आहे.
विशेष म्हणजे बाजारातून भाजीपाला आणण्यापासून ते संपूर्ण थाळी ग्राहकांना देण्यापर्यंतचं काम या संस्थेच्या महिलाच करत असून त्यांच्या या उपक्रमाचं सर्वच स्तरातून कौतुक होत आहे. पंढरपुरात दररोज २५ ते ३० हजार भाविक दर्शनसाठी येत असतात. याचा विचार करता आणि भाविकांचा आणि ग्राहकांचा प्रतिसाद पाहता जेवणाच्या वेळेत वाढ करण्यात येईल, तसेच पंढपूरसह इतर ठिकाणीही या योजनेचा विस्तार करण्याचा संस्थेचा संकल्प असल्याचं या संस्थेच्या पदाधिकाऱ्यांनी सांगितलं. दरम्यान, शिवसेनेने सुरू केलेल्या शिवभोजन थाळीला उत्तर म्हणून भाजपनेही दीनदयाळ थाळी सुरू केल्याने आगामी काळात या दोन्ही पक्षांमध्ये थाळी वॉर सुरू झाल्याचं पाह्यला मिळणार असल्याचं चित्रं आहे.
