मुंबई : ब्रिटीश ब्रॉडकास्टिंग कॉर्पोरेशन (BBC) च्या दिल्ली आणि मुंबईतील कार्यालयांवर आज मंगळवारी (१४ फेब्रुवारी) आयकर विभागाचे छापे टाकण्यात येत आहेत. आयकरच्या नियमांचं उल्लंघन झाल्याच्या तक्रारी प्राप्त झाल्यानंतर आयकर विभागानं सर्वेक्षण सुरु केल्याची माहिती आहे. आयटी विभागाचे अधिकारी बीबीसी कार्यालयातील कागदपत्रे आणि संगणक डेटा तपासत आहेत. सकाळी साडेअकरा वाजल्यापासून ही छापा सुरू आहे.
कार्यालयात उपस्थित असलेल्या सर्व कर्मचाऱ्यांना फोन न वापरण्यास सांगण्यात आल्याचे सूत्रांनी सांगितले. सर्व कर्मचाऱ्यांना एकाच खोलीत ठेवण्यात आले आहे. मुंबईतील बीबीसी कार्यालयात कोणाशीही संपर्क होऊ शकत नाही. आयकर अधिकारी इलेक्ट्रॉनिक उपकरणांचा बॅकअप घेतील आणि ते लोकांना परत देतील, अशी माहिती सूत्रांकडून मिळाली आहे.
BBC IT Red वर राजकारण
बीबीसी कार्यालयावरील छापेमारीवरूनही राजकारण सुरू झाले आहे. काँग्रेसने ट्विट करून या छाप्याचे वर्णन अघोषित आणीबाणी म्हणून केले आहे. काँग्रेसने ट्विटमध्ये लिहिले, “पहिली बीबीसी डॉक्युमेंटरी आली, त्यावर बंदी घालण्यात आली… आता बीबीसीवर आयटीचे छापे. अघोषित आणीबाणी.”
बीबीसीच्या माहितीपटावरून गदारोळ
बीबीसी हे लंडन स्थित मीडिया आउटलेट आहे जे अनेक वर्षांपासून भारतात पत्रकारिता करत आहे. अलीकडे बीबीसी त्याच्या एका वादग्रस्त माहितीपटामुळे खूप चर्चेत होता. अलीकडेच बीबीसीने पंतप्रधान नरेंद्र मोदी आणि गुजरात दंगली (2002) वर एक डॉक्युमेंट्री प्रसिद्ध केली होती, ज्यावर भारत सरकारने तीव्र आक्षेप नोंदवला होता.
बीबीसीच्या माहितीपटावरून संपूर्ण देशात खळबळ उडाली होती. केंद्र सरकारने या माहितीपटाला प्रोपगंडा म्हटले होते. केंद्र सरकारकडून जारी करण्यात आलेल्या निवेदनात म्हटले आहे की, हा माहितीपट एकतर्फी दृष्टीकोन दाखवतो, त्यामुळे स्क्रीनिंगवर बंदी घालण्यात आली होती. मात्र, सरकारच्या बंदीनंतरही अनेक विद्यापीठे आणि महाविद्यालयांमध्ये त्याचे स्क्रीनिंग करण्यात आले. यावरून दिल्लीतील जेएनयूमध्ये मोठा गदारोळ झाला होता.
