जळगाव,(प्रतिनिधी)- जळगाव मनपाच्या माजी महापौर जयश्री सुनील महाजन यांना शिवसेना उद्धव बाळासाहेब ठाकरे यांच्याकडून उमेदवारी जाहीर झाली आहे.महाविकास आघाडीत जळगाव शहर विधानसभेची जागा राष्ट्रवादी शरदचंद्र पवार पक्षाला सुटेल अशी शक्यता होती मात्र राष्ट्रवादीने अखेर ही जागा शिवसेना उबाठा पक्षाला सोडल्याने जयश्री महाजन यांना पक्षाने संधी दिली आहे.
राज्यात गेल्या काही दिवसापासून महाविकास आघाडीमध्ये जागा वाटपाचा तिढा सुरु होता. काल शरद पवार यांनी आपली पहिली यादी जाहीर केली. यात जळगाव जिल्ह्यातील देखील जळगाव ग्रामीण, मुक्ताईनगर व जामनेर विधानसभा मतदार संघात उमेदवार उभे केले असून आता उद्धव ठाकरे यांच्याकडून जळगाव शहरात माजी महापौर जयश्री महाजन यांना उमेदवारी जाहीर झाली आहे.
जळगाव शहर विधानसभा मतदार संघासाठी जोरदार मोर्चे बांधणी ठाकरे गटात सुरु होती. गेल्या दोन दिवसापासून महाविकास आघाडीत जागा वाटपाचा तिढा सुरु असताना हा तिढा अखेर सुटला असून जळगाव शहर विधानसभा मतदार संघासाठी आता माजी महापौर जयश्री महाजन यांना उमेदवारी फायनल झाली आहे.
