मुंबई: आजपासून महाराष्ट्रातील राजकारणाचा नवा अध्याय सुरू होणार असून पुन्हा एकदा शिवशक्ती आणि भीमशक्ती एकत्र येणार आहेत.आज शिवसेना आणि वंचित बहुजन आघाडीच्या युतीची घोषणा होणार आहे. त्यामुळे राज्यात महाविकास आघाडीला नवा भिडू मिळणार आहे. दरम्यान, आज होणाऱ्या या युतीच्या घोषणेकडे सर्वांचं लक्ष लागणार आहे.
दरम्यान, ठाकरे गटाचे खासदार संजय राऊत यांनी या युतीची घोषणा होणार असल्याचं ट्विट केलं आहे. शिवशक्ती आणि भीमशक्तीचा एल्गार, संयुक्त पत्रकार परिषद. 23 जानेवारी दुपारी 12.30 वाजता. आंबेडकर भवन, नायगाव, दादर… महाराष्ट्राच्या राजकारणातील नवे पर्व… असं ट्विट संजय राऊत यांनी केलं आहे.
शिवशक्ती आणि भीमशक्तीचा
एल्गार!!
संयुक्त पत्रकार परिषद
23 जानेवारी
12.30
आंबेडकर भवन
नायगाव..
महाराष्ट्राच्या राजकारणातील नवे पर्व.. pic.twitter.com/PYkNeNAO0Y— Sanjay Raut (@rautsanjay61) January 22, 2023
जागा वाटपावर भाष्य होणार?
उद्धव ठाकरे आणि प्रकाश आंबेडकर दोघेही संयुक्त पत्रकार परिषद घेऊन या युतीची घोषणा करणार आहेत. यावेळी दोघेही युतीच्या किमान समान कार्यक्रमाची माहिती देणार असल्याचं सांगितलं जातं. तसेच जागा वाटपावरही हे दोन्ही नेते भाष्य करण्याची चिन्हे असल्याचं सांगितलं जातं. तसेच या युतीच्या घोषणेवेळी महाविकास आघाडीतील इतर मित्र पक्षाचे नेते नसतील, अशी माहिती आहे.
