मुंबई- महाराष्ट्रात राष्ट्रपती राजवट लागू झाली असली तरी राज्यातील सत्तापेच लवकरात लवकर सोडवण्यासाठी काँग्रेस, राष्ट्रवादी आणि शिवसेनेने कंबर कसली आहे. राष्ट्रवादीचे अध्यक्ष शरद पवार येत्या दोन दिवसांत काँग्रेसच्या हंगामी अध्यक्षा सोनिया गांधी यांची भेट घेणार असून या भेटीत अंतिम निर्णय घेण्यात येणार आहे. त्यामुळे येत्या रविवारी १७ नोव्हेंबरपर्यंत राज्यातील सत्तापेच संपुष्टात येणार असल्याचं सांगण्यात येतं.
राज्यात राष्ट्रपती राजवट लागू झाल्यानंतर काँग्रेस आणि राष्ट्रवादी काँग्रेसने किमान समान कार्यक्रमावर शिवसेनेला पाठिंबा देण्याचे सुतोवाच केले आहे. त्यामुळे राज्यात सत्ता स्थापन करण्याच्या घडामोडींना वेग आला आहे. किमान समान कार्यक्रम ठरविण्यासाठी दोन्ही काँग्रेसची काल बैठकही झाली. किमान समान कार्यक्रमाचा मसुदा ठरल्यानंतर त्या मसुद्यावर शिवसेनेसोबत चर्चा करून काही गोष्टींचा त्यात समावेश करण्यात येणार आहे. त्यानंतर सत्तेतील पदांच्या वाटपाचं सूत्र ठरवण्यात येणार आहे. यापार्श्वभूमीवर राष्ट्रवादीचे अध्यक्ष शरद पवार रविवारी काँग्रेसच्या हंगामी अध्यक्षा सोनिया गांधी यांची भेट घेणार असून त्यांच्याशी राज्यातील परिस्थितीवर चर्चा करणार आहेत. त्यानंतरच राज्यात सत्ता स्थापन करण्याबाबतची अधिकृत घोषणा केली जाणार असल्याचं सूत्रांनी सांगितलं. त्यामुळे या दोन्ही नेत्यांमध्ये रविवारी होणाऱ्या बैठकीकडे सर्वांचं लक्ष लागलं आहे.
दरम्यान, राज्यातील आगामी मुख्यमंत्री शिवसेनेचाच होणार असल्याचं राष्ट्रवादी काँग्रेसने स्पष्ट केलं आहे. ‘मुख्यमंत्रिपदाच्या मुद्द्यावरच शिवसेना वेगळी झाली आहे. त्यामुळे त्यांचा सन्मान राखणं आणि त्यांचा स्वाभिमान जिवंत ठेवणं ही आमची जबाबदारी आहे. मुख्यमंत्री शिवसेनेचाच होईल. उपमुख्यमंत्रिपदाबाबत अद्याप चर्चा झालेली नाही. काँग्रेसला सत्तेत यायचंच नाही, तर मागण्या कुठून समोर यायला लागल्या? मला नाही वाटत. त्यांना तर बाहेरुन पाठिंबा द्यायचा आहे, आमची इच्छा आहे की त्यांनी सत्तेत यावं. पद, खाती याबाबत कोणतीही चर्चा झालेली नाही. येत्या दिवसात कोणताही वाद होणार नाही. आम्ही सगळे एकत्र बसून चर्चा करू, असं राष्ट्रवादीचे प्रवक्ते नवाब मलिक यांनी स्पष्ट केलं. मलिक यांच्या वक्तव्यामुळे राज्यात शिवसेनेचा पाच वर्षासाठी मुख्यमंत्री होणार असल्याचं स्पष्ट होत आहे. तसेच राष्ट्रवादीला उपमुख्यमंत्रिपद मिळणार असून काँग्रेस बाहेरून पाठिंबा देणार असल्याचंही स्पष्ट झाले आहे.
