मुंबई: राज्यात राष्ट्रपती राजवट लागू झाली असली तरी, युती आणि आघाडीतील पक्षांना सत्तास्थापनेची संधी असल्यानं त्यांनी जुळवाजुळव सुरू केली आहे. त्याचवेळी राष्ट्रवादी काँग्रेसचे अध्यक्ष शरद पवार यांनी पक्षाच्या आमदारांची बैठक घेऊन त्यांना धीर दिला. ‘राज्यात मध्यावधी निवडणुका होणार नाहीत. चिंता करू नका,’ अशी ग्वाही त्यांनी दिली. मुंबईतील बैठकीत ते बोलत होते.
विधानसभा निवडणूक निकालानंतर जवळपास २० दिवसांच्या सत्तानाट्यानंतर राज्यात राष्ट्रपती राजवट लागू झाली आहे. त्यानंतर केंद्रीय मंत्रिमंडळानं त्यास मंजुरी देऊन ती फाईल राष्ट्रपतींकडे स्वाक्षरीसाठी पाठवली. राष्ट्रपतींच्या स्वाक्षरीनंतर राज्यात काल राष्ट्रपती राजवट लागू झाली. मात्र अद्यापही युती आणि आघाडीतील पक्षांना सत्तास्थापनेची संधी आहे. त्यादृष्टीनं प्रत्येक पक्षानं जुळवाजुळव सुरू केली आहे. राज्यात नव्याने होऊ घातलेल्या संभाव्य शिवसेना-राष्ट्रवादी-काँग्रेस यांच्या आघाडीतील नेत्यांनी किमान समान कार्यक्रमावर चर्चेला सुरुवात केली आहे. दुसरीकडे शरद पवार यांनी राष्ट्रवादीच्या नवनिर्वाचित आमदारांची मुंबईत बैठक घेऊन त्यांना धीर देण्याचा प्रयत्न केला. महाराष्ट्रात मध्यावधी निवडणुका होणार नाहीत. चिंता करू नका, आमदारांना निवडणुकीला सामोरं जावं लागणार नाही, अशा शब्दांत त्यांनी दिलासा दिला.
यावेळी काँग्रेससोबत किमान समान कार्यक्रम निश्चित करण्यासाठी राष्ट्रवादी काँग्रेसनं पाच जणांची समिती स्थापन केली आहे. या समितीमध्ये प्रदेशाध्यक्ष जयंत पाटील, अजित पवार, छगन भुजबळ, धनंजय मुंडे आणि नवाब मलिक यांचा समावेश आहे.
