नवी दिल्ली: कोणत्याही परिस्थितीत काँग्रेसनं सरकारमध्ये सहभागी व्हावे या मतावर पक्षाचे महाराष्ट्रातील बहुतांश नेते ठाम आहेत. जर पक्ष सरकारमध्ये सहभागी होण्यात अपयशी ठरला तर, महाराष्ट्रात काँग्रेस संपेल, असा इशाराच या नेत्यांनी पक्षाच्या अध्यक्षा सोनिया गांधी यांना दिला आहे. काँग्रेस कार्यकारिणीच्या बैठकीत सोमवारी प्रदेशाध्यक्षांनी शिवसेनेसोबत सत्तेत सहभागी होण्याच्या मुद्द्यावर जोर दिला. अस्तित्वाच्या लढाईत सरकारमध्ये सहभागी होणे पक्षाच्या हिताचं आहे, असं मतही या नेत्यांनी व्यक्त केलं.
या बैठकीत माजी मुख्यमंत्री अशोक चव्हाण, पृथ्वीराज चव्हाण, प्रदेशाध्यक्ष बाळासाहेब थोरात, माणिकराव ठाकरे, रजनी पाटील आदी काँग्रेसच्या सर्व ज्येष्ठ नेत्यांनी शिवसेनेसोबत सरकारमध्ये सहभागी होण्याबाबत सूचवलं. निवडणूक निकालानंतर भाजप आणि शिवसेना यांच्यात निर्माण झालेल्या वितुष्टानंतर चालून आलेली संधी कोणत्याही परिस्थितीत सोडायची नाही, असं मत या नेत्यांनी व्यक्त केल्याचं समजतं. काँग्रेसनं याही पुढे जाऊन ही संधी साधून सरकारमध्ये सहभागी व्हायला हवे, असंही मत त्यांनी व्यक्त केलं.
नवनिर्वाचित आमदार सरकारमध्ये सहभागी होण्यास उत्सुक
विधानसभा निवडणुकीत विजयी झालेले नवनिर्वाचित आमदार सरकारमध्ये सहभागी होण्यास उत्सुक आहेत, असं या नेत्यांनी अध्यक्षा सोनिया गांधींना सांगितलं. स्वच्छ प्रतिमा आणि स्वतःच्या ताकदीवर निवडून आलो आहोत, असं या आमदारांचं म्हणणं आहे. निवडून आल्यानं काही आमदार आक्रमक झाले आहेत, असं सांगून त्यांनी एकप्रकारे आमदार फुटण्याच्या शक्यतेकडेही लक्ष वेधले. दुसरीकडे आमदार फुटू शकतात या भीतीनं त्यांना जयपूरमध्ये हलवण्यात आले आहे. त्यावर जास्त दिवस ते संयम ठेवू शकत नाहीत आणि भाजपकडून आमदार फोडले जाण्याची भीती कायम राहील, ही बाबही त्यांनी पक्षश्रेष्ठींच्या निदर्शनास आणून दिली.
शिवसेनेसोबत जाण्यास वरिष्ठ नेत्यांचा विरोध
शिवसेनेसोबत जाण्यास महाराष्ट्रातील काँग्रेसचे नेते उत्सुक असले तरी, अन्य राज्यांतील पक्षाच्या वरिष्ठ नेत्यांचा त्याला विरोध आहे. शिवसेनेसोबत जाण्याच्या निर्णयाला त्यांचा विरोध आहे. त्यात अँटनी, मुकुल वासनिक आणि माजी गृहमंत्री शिवराज पाटील यांचा समावेश आहे. शिवसेनेसारख्या हिंदुत्ववादी विचारणीच्या पक्षासोबत तडजोड केल्यास त्याचा फटका काँग्रेसला इतर राज्यांत बसू शकतो, असं मत त्यांनी व्यक्त केल्याचं सांगितलं जातं.
