बुलढाणा । बुलढाणा जिल्ह्यात पुन्हा भीषण अपघात झाला आहे. दोन ट्रॅव्हल्सची समोरासमोर धडक होऊन हा अपघात झाला. या अपघात ७ जणांचा मृत्यू झाला असून 25 ते 30 प्रवासी जखमी झाले आहेत. हा अपघात मलकापूर शहरातील हायवे क्रमांक सहावर झाला असून जखमींपैकी काहींची प्रकृती गंभीर असल्यानं मृतांचा आकडा वाढण्याची भीती व्यक्त केली जात आहे.
याबाबत अधिक असे की, मलकापूर शहरातून जाणाऱ्या हायवे क्रमांक सहावर पहाटे तीन वाजता दोन ट्रॅव्हल्सची समोरासमोर धडक झाली. ही घटना लक्ष्मी नगर उड्डान पुलावर घडली आहे.यातील एक ट्रॅव्हल्स ही तीर्थयात्रा करून अमरनाथ येथून हिंगोलीच्या दिशेनं येत होती. या ट्रॅव्हल्समध्ये 35 ते 40 भाविक होते. तर समोरून येणाऱ्या ट्रॅव्हल्समध्ये 25 ते 30 प्रवाशी होते. ही ट्रॅव्हल्स नागपूर वरून नाशिकच्या दिशेने जात होती.
या भीषण अपघातामध्ये सात जणांचा मृत्यू झाला आहे. तर 20 ते 25 प्रवासी जखमी आहे. जखमींना स्थानिकांच्या मदतीनं मलकापूर उपजिल्हा रुग्णालयात दाखल करण्यात आलं आहे. ज्यांची प्रकृती चिंताजनक आहे, त्यांना पुढील उपचारासाठी बुलढाण्यात हलवण्यात आलं आहे. दरम्यान यातील काही प्रवाशांची प्रकृती चिंताजनक असल्यानं मृतांचा आकडा वाढण्याची शक्यता आहे.
