दिवसेंदिवस बलात्काराच्या, सामूहिक आत्याच्याराच्या घटना वाढत असतांना आता एका 30 वर्षीय विवाहित महिलेवर तिच्याच सासऱ्याने, दिराने नंतर मामेभावाने सामूहिक बलात्कार केल्याची धक्कादायक घटना उघडकीस आली असून नातेवाईकांनीचं सामूहिक अत्याचार केल्याने महिला घरात देखील सुरक्षित नाहीत का असा प्रश्न पुढे आला आहे.विशेष म्हणजे वाच्यता करू नये यासाठी तिच्या नवऱ्याने लाठी-काठी, दगड व वीटांनी बेदम मारहाण केली आहे.दरम्यान महिला गंभीर जखमी झाल्याने दवाखान्यात उपचार्थ दाखल करण्यात आले होते.
प्राप्त महितीनुसार, टिटवाळा नजीक एका गावात एक पती-पत्नी आपल्या दोन मुलांसोबत राहतात. पती-पत्नी विटभट्टीवर काम करून आपल्या कुटुंबियांची उदरनिर्वाह करत होते. घटनेच्या दिवशी 6 सप्टेंबरला विवाहित महिलेचा नवरा हा बाजारात गेला होता. यावेळी 30 वर्षीय महिला घरात एकटी असल्याचे पाहून रात्री दहा वाजेच्या सुमारास सासरा, दिर आणि एक अल्पवयीन नातेवाईक झोपडीत प्रवेश केला.आणि तिघांनी मिळून महिलेवर आळीपाळीने अत्याचार केला. या घटनेनंतर नराधम पळून गेले होते.
ही घटना घडल्यानंतर ज्यावेळेस नवरा घरी आला तेव्हा पीडित विवाहितेने बलात्काराची घटना आपल्या नवऱ्याला सांगितली. मात्र यावर तिच्या नवऱ्याने लाठी-काठी, दगड व वीटांने तिला बेदम मारहाण करत घडलेली घटना कोणालाही सांगू नको असा दम भरला. यानंतर महिलेची अवस्था गंभीर असल्याने तिला तातडीने ठाण्यातील जिल्हा रुग्णालयात उपचारासाठी दाखल करण्यात आले होते. तिच्यावर जवळपास दोन दिवस उपचार करण्यात आले.
अखेर या प्रकरणात महिलेने टिटवाळा पोलीस ठाण्यात तक्रार दिली. पोलिसांनी महिलेच्या तक्रारीनंतर पती, सासरा, आणि दिराविरोधात गुन्हा दाखल करून दोघांना अटक केली आहे तर एका अल्पवयीन आरोपीची चौकशी सुरू केली आहे. या घटनेचा अधिक तपास पोलीस करीत आहेत.
