मुंबई : भाजप नेते आणि माजी खासदार किरीट सोमय्या यांच्या गाडीवर काही दिवसांपूर्वी मुंबईत हल्ला करण्यात आला होता. यावेळी काच फुटल्यानंतर सोमय्या यांच्या हनुवटीला जखम झाली होती. यामुळे सोमय्या यांनी केंद्रीय गृहसचिवांकडे या घटनेची चौकशी करण्याची मागणी केली होती. मात्र किरीट सोमय्या हल्लाप्रकरणी आता मोठी बातमी समोर येते आहे. भाजपन नेते किरीट सोमय्यांना किरकोळ जखम झाल्याचा अहवाल भाभा रुग्णालयाचा अहवाल दिला आहे.
त्यात सोमय्या यांना झालेली जखम ही ०.१ सेमीची होती, तसंच रक्तस्त्राव झाला नव्हता, असं वैद्यकीय तपासणीच्या अहवालात नमूद करण्यात आल्याचे समजते. हा अहवाल रुग्णालयाकडून मुंबई पोलिसांना देण्यात आल्याचीही माहिती आहे.
वैद्यकीय अहवाल समोर आल्यानंतर आता राज्यातील सत्ताधारी महाविकास आघाडीच्या नेत्यांकडून पुन्हा एकदा किरीट सोमय्या यांना लक्ष्य केलं जाण्याची शक्यता आहे. कारण शिवसेना नेते संजय राऊत यांनी याआधीच सोमय्या यांच्यावर निशाणा साधत ते चेहऱ्याला टोमॅटो सॉस लावून फिरत असल्याची टीका केली होती.
एकीकडे, भाभा रुग्णालयातील वैद्यकीय अहवालातून सोमय्या यांना झालेली जखम गंभीर नसल्याचा अहवाल देण्यात आलेला असतानाच आज किरीट सोमय्या यांच्यासह भाजपचे काही नेते राज्यपाल भगतसिंह कोश्यारी यांची भेट घेणार आहे. या भेटीत भाजप नेत्यांकडून राज्यपालांकडे काय मागणी केली जाते, हे पाहणं महत्त्वाचं ठरणार आहे.
