मुंबई :शिवरायांविषयी वादग्रस्त विधान केल्याने महाराष्ट्राचे राज्यपाल भगतसिंह कोश्यारी टीकेचे धनी बनले आहे. राज्यपालांच्या वादग्रस्त वक्तव्याने विरोधकांकडून राजीनाम्याची मागणी केली जात आहे. दरम्यान यावर भाजप खासदार उदयनराजे भोसले यांनी पत्रकार परिषद घेत कोश्यारी यांच्यावर पुन्हा निशाणा साधत भावूक वक्तव्य केलं होते.
त्यांच्या वाक्याचा संदर्भ घेत राज्याचे उपमुख्यमंत्री देवेंद्र फडणवीस यांनी राज्यापालांच्या राजीनाम्याविषयी सूचक वक्तव्य केले आहे.
काय म्हणाले फडणवीस?
यावेळी फडणवीस म्हणाले की, खासदार उदयनराजे भोसले यांच्या पाठीशी भारतीय जनता पक्ष कायम आहे. त्यांच्या भावना योग्य ठिकाणी पोहोचविण्यात आल्या आहेत, असल्याचे फडणवीस म्हणाले. ते पुण्यात पत्रकारांशी बोलत होते.
छत्रपती घराण्याचे वंशज कधीच हतबल होऊ शकत नाहीत. त्यांच्या भावना योग्य ठिकाणी पोहचल्या आहेत. राज्यपाल हे संविधानिक पद आहे. यात सरकार काही हस्तक्षेप करू शकत नाही. राज्यपालांना पदमुक्त करण्याचे अधिकार राष्ट्रपतींना आहेत, असे फडणवीस यांनी सांगितले.
दरम्यान, राज्यपालांविरोधात उदयनराजेंनी आक्रमक भूमिका घेत भावूक वक्तव्य केलं होते.शिवरायांचा अपमान होताना सर्वपक्ष गप्प का? थोर पुरुषांचा अवमान करणाऱ्यांवर देशद्रोहाचा गुन्हा का नाही. हे पाहण्यापेक्षा मेलो असतो तर परवडलं असतं? असे ते म्हणाले होते.विकृतीकरण थांबवलं नाही तर नव्या पिढीसमोर कोणता इतिहास मांडणार. असा सवाल उपस्थित केला.
