हिंगोलीः हिंगोलीत एक हृदयद्रावक घटना घडली आहे. तालुक्यातील बासंबा येथे आईच्या निधनानं हताश झालेल्या लेकीने गळफास घेऊन आत्महत्या केल्याची घटना घडली आहे. या घटनेने परिसरात एकच खळबळ उडाली आहे.
तालुक्यातील बासंबा येथे मागील काही दिवसांपूर्वी आईचे निधन झाले होते. आईच्या निधनामुळं दुःखी झालेल्या मुलीने गळफास घेऊन आत्महत्या केल्याची घटना समोर आली आहे. बासंबा येथील बजरंग कुरवाडे यांचा विवाह अंतकला हिच्यासोबत झाला होता. त्यांना चार मुली व एक मुलगा असं कुटुंब होते. काही वर्षानंतर त्यांची पत्नी अंतकला हिचे निधन झाल्याने त्यांनी दुसरा विवाह केला होता. मागील वर्षी पहिल्या पत्नीची मुलगी शीतल हिचा विवाह बोरी शिकारी येथील विठ्ठल होळकर यांच्या सोबत झाला होता.
विवाहानंतर ती सासरी नांदायला देखील गेली होती. काही दिवस सगळं सुरळीत चालू असताना शीतलला तिच्या आईची नेहमी आठवण येत असल्याने ती त्याच दुःखात राहत होती. माझी आई नसल्याने माझं कसं होईल असे ते नेहमी म्हणत होती. परंतु सासरचे अनेक जण तिला समजवण्याचा प्रयत्न करीत होते. त्याच दरम्यान तिने काल गोठ्यातील लाकडी दांड्याला गळफास घेत आपले जीवन संपवले.
याप्रकरणी मयत शितलचे वडील बजरंग कुर्डूवाडी यांनी बासंबा पोलीस ठाण्यात दिलेल्या माहितीवरून अकस्मात मृत्यूची नोंद करण्यात आली आहे. घटनेचा तपास पोलिस अधिक करीत आहेत. दरम्यान या प्रकरणातील शितल होळकर ही गर्भवती आल्याची महिती पोलीसांनी दिलीय. या घटनेमुळे परिसरात हळहळ व्यक्त होत आहे.
