जळगाव, (प्रतिनिधी) – बीएचआर पतसंस्थेच्या मालमत्ता मातीमोल भावात घेऊन अंदाजित अकराशे कोटी रुपयांचा गैरव्यवहार झाला असून गेल्या सरकारनं सदर चौकशी थांबवून ठेवली होती असा गौप्यस्फोट राष्ट्रवादीचे नेते माजी मंत्री एकनाथ खडसे यांनी दोनदिवसापूर्वी केल्यानंतर विधानपरिषदेचे विरोधीपक्ष नेते प्रविण दरेकर यांनी सध्या खडसे साहेबांना काम नाही… अशी टीका करत टोला लगावला आहे.
राष्ट्रवादीत गेल्यानंतर आपण भाजपवर आरोप करतोय आणि काही प्रकरणे उकरून काढतोय, हेच दाखवण्यासाठी एकनाथ खडसे साहेब धडपड करतायत! असं आपल्या ट्विटर हॅण्डल वरून ट्विट करुन टीका केली आहे.
प्रविण दरेकर यांनी सोबतच एक व्हिडीओ शेअर केला आहे त्यात त्यांनी म्हटलं आहे की, बीएचआर प्रकरणात चौकशी सुरु आहे, चौकशी अंती सर्व बाहेर येईलच. तसेच राज्य सहकारी बँकेने पाचशे पाचशे कोटीचे कारखाने दहा, पंधरा कोटीत विकले त्याची चौकशी करा…राज्य सहकारी बँकांनी अशा प्रकल्पांना कर्ज दिले की त्याठिकाणी फक्त जागाचं आहे, प्रकल्प नाही.राज्यातील सर्व जिल्हा बँका, अर्बन बँका, पतपेढ्यांच्या एकदाच चौकशा लावाव्यात मग त्या कोणत्याही पक्षाच्या असोत… एकदाच काय त्या चौकशा लावा आणि सत्य स्थिती महाराष्ट्राच्या जनतेसमोर आणा. प्रत्येक वेळी पक्षाचे नेते आप आपल्या सोयीने चौकशीचे गुऱ्हाळ उभ करतात ते महाराष्ट्राच्या जनतेसमोर जाईल असं ते यावेळी म्हणाले आहे.
