जळगाव,(प्रतिनिधी)- जळगाव ग्रामीण विधानसभा मतदारसंघातील महायुतीचे उमेदवार शिवसेनेची बुलंद तोफ गुलाबराव पाटील यांनी पहिल्या फेरी पासून घेतलेली मोठी आघाडी कायम ठेवत दणदणीत विजय मिळवला असून या ठिकाणी राष्ट्रवादी शरद पवार पक्षाचे उमेदवार गुलाबराव देवकर यांचा पराभव झाला आहे.
जळगाव ग्रामीण विधानसभा मतदारसंघातून विद्यमान पाणी पुरवठा मंत्री तथा जिल्ह्याचे पालकमंत्री ना. गुलाबराव पाटील यांनी विजयाची हॅटट्रीक केली आहे.त्यांना शिवसेनेने उमेदवारी दिल्यानंतर महायुतीचे उमेदवार म्हणून ते रिंगणात उतरले होते. तर राष्ट्रवादी शरदचंद्र पवार पक्षाच्या वतीने माजी मंत्री गुलाबराव देवकर हे महाविकास आघाडीचे उमेदवार म्हणून मैदानात उतरले.
प्रचाराच्या दरम्यान, जळगाव ग्रामीण विधानसभा मतदारसंघात मोठी चुरस पहायला मिळाली. दोन्ही बाजूंनी हिरीरीने प्रचार केल्यामुळे येथील लढत ही अतिशय चुरशीची झाली. निवडणुकीत दोन्ही उमेदवारांनी एकमेकांवर कडाडून टिका करतांनाच आरोप-प्रत्यारोपांच्या फैरी झाडल्या. गुलाबराव देवकरांसाठी शरद पवार व एकनाथराव खडसे यांनी तर गुलाबराव पाटलांसाठी मुख्यमंत्री एकनाथ शिंदे यांनी सभा घेतल्या. या मतदारसंघातून 69.33 टक्के मतदारांनी आपला हक्क बजावला होता. यात कुणाची सरशी होणार ? याकडे सर्वांचे लक्ष लागले होते.
आज सकाळी आठ वाजेपासून मतमोजणी सुरू करण्यात आली. यात प्रारंभी टपालाने करण्यात आलेल्या मतांची मोजणी करण्यात आली. यामध्ये प्रामुख्याने शासकीय अधिकारी व कर्मचारी, दिव्यांग, वयोवृध्द आदींनी केलेल्या मतदानाचा समावेश होता. या टपाली मतदानाच्या पहिल्या फेरीत गुलाबराव पाटील यांना आघाडी मिळाली होती दरम्यान गुलाबराव पाटील यांनी आघाडी कायम ठेवत विजय मिळवला आहे.
