लोकमान्य टिळक टर्मिनल ते जयनगरकडे जाणाऱ्या पवन एक्स्प्रेसमध्ये विना तिकीट प्रवास करणारा प्रवासी आणि टीटी यांच्यात झालेल्या भांडणाचा व्हिडिओ सोशल मीडियावर व्हायरल होत आहे. यात दोन ट्रेन तिकीट चेकर प्रवाशाला लाथांनी मारत करत असल्याचे व्हिडीओमध्ये दिसून येतेय. त्यानंतर प्रवाशाला बेदम मारहाण करणाऱ्या या दोन्ही टीटीईंना तात्काळ निलंबित करण्यात आलं असून त्यांच्यावर कठोर कारवाई केली जाईल, असं सीपीआरओने सांगितलं.
नेमकी काय आहे घटना?
2 जानेवारी रोजी ढोली स्टेशनजवळ लोकमान्य टिळक टर्मिनलवरून जयनगरकडे जाणाऱ्या पवन एक्स्प्रेसच्या सर्वसाधारण बोगीमध्ये समस्तीपूर रेल्वे विभागातील दोन टीटी प्रवासी तिकीट तपासत होते. दरम्यान, टीटीने वरच्या सीटवर बसलेल्या प्रवाशाला तिकीट दाखवण्यास सांगितले तेव्हा त्या प्रवाशाने आधी स्वत:ला लोको पायलट असल्याचे सांगितले.
यावर टीटीने लोको पायलट असल्याचे ओळखपत्र दाखवण्यास सांगितले. मग प्रवाशी स्वतःला मोठा अधिकारी म्हणवू लागला. त्यावरून टीटी आणि प्रवाशामध्ये वाद सुरू झाला. प्रकरण इतके वाढले की, विना तिकीट वरच्या सीटवर बसलेल्या प्रवाशाने टीटीला लाथ मारली. यानंतर एका टीटीने त्याला वरच्या सीटवरून खाली ओढले आणि खाली जमिनीवर टाकले. त्यानंतर दोन्ही टीटींनी लाथा-बुक्क्या सुरू केल्या.
Video of 2 TTEs beating a passenger fiercely in #Muzaffarpur went viral, taking cognizance of the video, Railways suspended both TTEs #Viralvideo pic.twitter.com/QpCXrjiY9u
— Meghana (@1_meghana) January 6, 2023
ट्रेनमध्ये बसलेले इतर प्रवासी तिकीट चेकरला मारहाण करण्यापासून अडवत होते, पण ते थांबले नाहीत. अखेर प्रवाशांनी मध्ये पडून टीटीईला मारहाण करण्यापासून रोखलं. तुम्हाला प्रवाशाला मारहाण करण्याचा कोणताही अधिकार नाही, असं टीटीई सांगितलं. दरम्यान या मारहाणीत प्रवासी गंभीर जखमी झाला. टीटीईचे हे कृत्य पाहून इतर प्रवासी संतप्त झाले आणि त्यांनी ट्रेनमध्ये गोंधळ घालण्यास सुरुवात केली. यादरम्यान आरपीएफच्या पथकाने ट्रेन गाठली आणि जखमी प्रवाशाला बाहेर काढले. यादरम्यान एका प्रवाशाने या संपूर्ण घटनेचा व्हिडीओ बनवला.
तर दुसरीकडे हा टीटीईने प्रवाशाला केलेल्या मारहाणीचा व्हिडीओ व्हायरल झाल्यानंतर रेल्वे प्रशासनाने तातडीने पाऊल उचललं. दोन्ही तिकीट चेकरला तात्काळ निलंबित केलं. तसंच त्यांच्यावर कठोर कारवाई केली जाईल, असंही सांगितलं.
