जळगाव : राज्यासह जळगाव जिह्यात अपघाताचे प्रमाण दिवसेंदिवस वाढताना दिसून येत आहे. अशातच अपघाताची एक धक्कादायक घटना समोर आलीय. आयशरने दुचाकीला मागून धडक दिल्यामुळे दुचाकीवरील दोघेजण रस्त्यावर पडले. तेवढ्यात समोरून खडीने भरलेले ट्रॅक्टरचे चाक त्यातील एका तरुणाच्या डोक्यावरून गेल्याने जागीच ठार झाला.
प्रशांत भागवत तायडे (वय- 30, रा. गहूखेडा, ता.रावेर, जि. जळगाव) असे मृत तरूणाचे नाव आहे. तर जयेश द्वारकानाथ पाटील (वय-२३, रा. गहूखेडा ता. रावेर) हा गंभीर जखमी झाला असून त्याला खासगी रूग्णालयात दाखल करण्यात आले आहे.
याबाबत अधिक माहिती अशी की, प्रशांत तायडे आणि जयेश पाटील हे दोघे मित्र रावेर तालुक्यातील गहुखेडा येथील रहिवाशी आहे. दोघेजण धरणगाव तालुक्यातील चिंचपूरा येथील आबासाहेब शिवाजीराव सिताराम पाटील इंन्स्ट्यूट ऑफ पॉलिटेक्नीक येथे मेकॅनिकल डिप्लोमाच्या दुसऱ्या वर्षात शिकत आहेत. डिप्लोमाचा परिक्षा असल्याने शुक्रवारी 6 जानेवारी रोजी तिसरा पेपर असल्याने दोघे मित्र सकाळी गहुखेडा येथून दुचाकी क्रमांक (एमएच 19 सीपी 2355) ने जळगावमार्गे चिंचपूरा येथे जाण्यासाठी निघाले.
दुपारी 1 वाजेच्या सुमारास जळगावातील खोटे नगर जवळील वाटिकाश्रम समोरील राष्ट्रीय महामार्गवर भरधाव आयशर क्रमांक (एमएच 19 सीवाय 8167) ने दुचाकीला मागून धडक दिली. त्यामुळे दुचाकीवरील दोघेजण रस्त्यावर पडले. तेवढ्यात समोरून खडीने भरलेले ट्रॅक्टर क्रमांक (एमएच 19 एएन 2438) वाहना खाली प्रशांत तायडे आल्याने त्याच्या डोक्यावरून ट्रॅक्टरचे पुढचे चाक गेल्याने जागीच ठार झाला. तर मागे बसलेला त्याचा मित्र जयेश द्वारकानाथ पाटील हा गंभीर जखमी झाला.
