बेंगळुरू- महाराष्ट्रात शिवसेना, काँग्रेस आणि राष्ट्रवादी काँग्रेस एकत्र येऊन सत्ता स्थापन करतील अशी शक्यता असताना कर्नाटकचे माजी मुख्यमंत्री एच. डी. कुमारस्वामी यांनी काँग्रेसने महाराष्ट्रात भाजपसोबत जावे, असा सल्ला दिला आहे. शिवसेना हा ज्वलंत हिंदुत्वाचा पुरस्कार करणारा पक्ष आहे. तुलनेत भाजपचं हिंदुत्व मवाळ असून भाजपसोबत जाणं काँग्रेससाठी अधिक सोयीचं ठरेल, असा तर्कही कुमारस्वामी यांनी मांडला आहे.
महाराष्ट्रातील सत्ताकोंडी पाहता तीन पक्षांच्या सरकारचा भाग होण्यापेक्षा दोन पक्षांच्या सरकारचा विचारही काँग्रेसने करायला हवा. काँग्रेस भाजपसोबत गेल्यास ते संयुक्तिक होईल, असेही कुमारस्वामी यांनी पुढे नमूद केले. शिवसेना हा पक्ष हिंदुत्वाच्या मुद्द्यावर नेहमीच आक्रमक राहिला आहे. त्यामुळे अशा पक्षासोबत सरकारमध्ये सहभागी होण्याऐवजी हिंदुत्वाबाबत तितकीशी आक्रमक भूमिका नसणाऱ्या भाजपसोबत काँग्रेसने जावे. ते त्यांच्या हिताचे ठरेल व ही आघाडी सहज असेल, असेही कुमारस्वामी पुढे म्हणाले.
काँग्रेस व जेडीएसच्या आमदारांनी बंड केल्याने कर्नाटकातील कुमारस्वामी सरकार गडगडले होते. त्यानंतर राज्यात भाजपचं सरकार विराजमान झालं आहे. या सगळ्या राजकीय नाट्यात १५ आमदारांना विधानसभाध्यक्षांनी अपात्र ठरवलं होतं. या सर्व मतदारसंघांत येत्या ५ डिसेंबर रोजी पोटनिवडणुका होत असून या पोटनिवडणुकीच्या निकालानंतर पुन्हा समीकरणं बदलणार आहेत. त्यावर बोलताना १५ पैकी ८ ते १० जागांवर आम्ही विजयी होणार असून या निकालानंतर राजकारणाचा नवा अंक सुरू होईल व त्याचे पडसाद महाराष्ट्रातील राजकारणावरही पाहायला मिळतील, असे कुमारस्वामी यांनी सांगितले.
दरम्यान, महाराष्ट्रातील सत्ताकोंडी अद्याप कायम असून काँग्रेस अध्यक्षा सोनिया गांधी आणि राष्ट्रवादी काँग्रेसचे अध्यक्ष शरद पवार यांची महत्त्वाची बैठक होत आहे. या बैठकीत महाराष्ट्रातील सत्तापेचावर चर्चा होईल व शिवसेनेसोबत जाण्यावर दोन्ही नेत्यांचा अंतिम निर्णय होईल, अशी शक्यता वर्तवण्यात येत आहे. त्यामुळे या बैठकीकडे सर्वांचे लक्ष लागले आहे.
