मुंबई- राफेल विमान खरेदी प्रकरणावरून सध्या काँग्रेस आणि भाजपामध्ये जुंपली आहे. राफेल प्रकरणी गुन्हा दाखल करावा लागेल म्हणूनच सरकारने जाणीवपूर्वक जुलै २०१८ मध्ये भ्रष्टाचार प्रतिबंधक कायद्यात दुरुस्ती केली, असा आरोप काँग्रेस नेते आणि माजी मुख्यमंत्री पृथ्वीराज चव्हाण यांनी पत्रकार परिषदेत केला.
राफेल प्रकरणी गुरुवारी सर्वोच्च न्यायालयाने केंद्र सरकारला क्लिन चीट दिली. त्यानंतर राफेलवरून सरकारवर आरोपांची सरबत्ती करणाऱ्या काँग्रेसने माफी मागावी अशी मागणी भाजपने लावून धरली आहे. काँग्रेसवर विशेषत: राहुल गांधींवर भाजपने निशाणा साधला आहे. राहुल गांधी यांनी देशाची माफी मागावी यासाठी भाजपतर्फे आंदोलनही उभे करण्यात येणार आहे.
पृथ्वीराज चव्हाण म्हणाले, ‘लोकसेवकांकडून राफेल विमान खरेदीमध्ये कसा भ्रष्टाचार झाला आहे, याची माहिती याचिकेत दिली होती. एफआयआर दाखल करणे कसे गरजेचे आहे, ते यात नमूद केले होते. ललिता कुमार खटल्यात कोर्टाचा स्पष्ट निकाल होता की दखलपात्र गुन्हा घडल्याचं तक्रारीत म्हटलं असेल तर त्यासंबंधी गुन्हा दाखल झाला पाहिजे. त्यामुळे राफेलप्रकरणीही गुन्हा दाखल व्हावा असं आमचं म्हणणं आहे. ‘
जुलै २०१८ मध्ये सरकारने भ्रष्टाचार प्रतिबंधक कायद्यात दुरुस्ती केली होती. लोकसेवकाविरोधात गुन्हे दाखल करण्यापूर्वी सरकारची मंजुरी घ्यावी लागेल, असे भ्रष्टाचार प्रतिबंधक कायद्यामध्ये म्हटले गेले आहे. हे प्रकरण सुरू असल्याचे सरकारला माहिती होते. त्यामुळे सरकारने हा बदल केल्याचा आरोप चव्हाण यांनी केला आहे.
