नवी दिल्ली : सोशल मीडियाच्या माध्यमातून अल्पवयीन मुलीशी मैत्री केल्यानंतर एका तरुणाने तिला भेटायला बोलावले आणि नंतर तिचे अपहरण करून बलात्कार केला. तरुणाने मुलीला 2 दिवस खोलीत कोंडून ठेवले आणि तिच्यासोबत बलात्काराचा प्रकार सुरू ठेवल्याचा आरोप आहे. हा धक्कादायक प्रकार दक्षिण दिल्लीतील वसंत कुंज भागातील असून याप्रकरणी संशयित तरुणाला अटक करण्यात आलेली आहे.
अल्पवयीन मुलीने तरुणावर बलात्कार आणि 2 दिवस खोलीत डांबून ठेवल्याचा आरोप केला होता. त्यानंतर पोलिसांनी गुन्हा दाखल करून तपास सुरू केला. तपासादरम्यान पोलिसांनी आरोपींच्या मालकीच्या अनेक ठिकाणी छापे टाकले.
आरोपी सोशल मीडियाच्या आहारी गेला असून तो इन्स्टाग्रामसह विविध प्लॅटफॉर्मवर व्हिडिओ शेअर करत असल्याचे तपासात समोर आले आहे. त्याच्या ठाव ठिकाणाबाबत माहिती मिळताच पोलिसांनी त्याच्या अकाउंटचा तपास केला आणि आरोपीला अटक केली.
मुलींना प्रेमाच्या जाळ्यात भुलवायचा
तपास करणाऱ्या पोलिस अधिकाऱ्यांनी सांगितले की, आरोपीला इंस्टाग्रामवर व्हिडिओ अपलोड करण्याची सवय आहे. त्याच्या व्हिडिओवर येणाऱ्या कमेंट्सनंतर आरोपी मुलींशी गप्पा मारायचा आणि नंतर मुलींना मोहक गोष्टींमध्ये अडकवायचा.
त्याने अल्पवयीन मुलीसोबतही असेच केले आणि लग्नाचे आमिष दाखवून बलात्कार केल्याचा आरोप आहे. आता पोलीस आरोपीच्या गुन्ह्याची कुंडली तपासत असून त्याने आणखी किती मुलींसोबत असे प्रकार केले आहेत, याचा शोध घेत आहेत.
