जळगाव : तब्बल दोन वर्षांनंतर राष्ट्रवादी काँग्रेसचे अध्यक्ष शरद पवार हे जळगाव जिल्हा दौऱ्यावर असून यावेळी राष्ट्रवादी काँग्रेसचे एकनाथ खडसे यांनी शरद पवारांचं स्वागत केलं. एकनाथ खडसेंनी यावेळी भाषण करताना भाजप नेत्यांचा चांगलाच समाचार घेतला. गृहमंत्री पदाचा हिसका भाजप नेत्यांना दाखवा, असं ही खडसे म्हणाले.
जनतेने आम्हाला ४०-४० वर्ष निवडून दिले आणि त्यामुळे मी मुख्यमंत्रीपदाच्या शर्यंतीपर्यंत पोहोचलो. पण आज माझे पाय, बोट धरणारे पोरं मला शिकवायला लागले आणि शरद पवारांवर बोलायला लागले, मला आश्चर्य वाटते या गोष्टीचे, असं खडसे म्हणाले.
‘जयंत पाटील यांना मी म्हणायचो तुम्ही खूप साधे-भोळे आहात. दिलीप वळसे-पाटील यांनाही अनेकदा सांगितले की तुम्ही गृहमंत्रीपदाचा हिसका दाखवा. शेकडो प्रकरण आहेत, एकदा दणका दाखवाच. दोन-चार लोकांना आत टाकले असते तर ही परिस्थिती आली नसती’, असंही खडसे यावेळी म्हणाले. तसेचं जे सत्य आहे ते करा, कोणाला छळू नका, द्वेषाचे राजकारण करू नका, पण ज्यांनी केलं आहे त्यांना ते भोगायला लावा. तर ही परिस्थिती निर्माण होणार नाही. जनतेच्या मनातील ही इच्छा आहे, असंही बोलायला खडसे विसरले नाही.
