जळगावः सोशल मीडियावर मुख्यमंत्री उद्धव ठाकरे यांच्याबाबत आक्षेपार्ह पोस्ट केल्याचा दावा करत आणि हातात कायदा घेत दाम्पत्याला मारहाण करणाऱ्या शिवसैनिकांवर अखेर जळगाव शहर पोलीस ठाण्यात गुन्हा दाखल करण्यात आला आहे. रविवारी जळगावात शिवसेनेचे पदाधिकारी, शिवसैनिकांनी एका दाम्पत्यास मारहाण करीत जखमी केले तसेच महिलेल्या गळ्यातील मंगळसूत्र गहाळ झाले आहे. याप्रकरणी जळगावचे शिवसेना जिल्हाप्रमुख, जिल्हा संपर्कप्रमुख व प्रमुख पदाधिकाऱ्यांसह शिवसैनिकांवर रात्री उशिरा शहर पोलिस ठाण्यात गुन्हा दाखल झाला.
या दाम्पत्याने मुख्यमंत्री उद्धव ठाकरे यांच्याविषयी कुठलिही आक्षेपार्ह पोस्ट व्हायरल केली नव्हती. मात्र, तरीही शिवसैनिकांनी बेदम मारहाण केली. जळगावमध्ये शिवसैनिकांनी कायदा हातात घेण्याचा हा दुसरा प्रकार आहे. यापूर्वीही शिवसैनिकांनी मुख्यमंत्र्यांबाबत आक्षेपार्ह पोस्ट केली म्हणून एका ज्येष्ठास भरचौकात चोप दिला होता. तसेच त्यांना मुख्यमंत्र्यांची जाहीर माफी मागायला लावून त्याचा व्हिडिओ केला होता. या घटनांमुळे नागरिकांमध्ये संताप आहे.
हे पण वाचा :
काळजी घ्या ! राज्यातील ‘या’ भागात आजपासून तीन दिवस उष्णतेच्या लाटेचा धोका
परराज्यातील तरुणींकडून जबरदस्तीने वेश्याव्यवसाय, छापेमारीत दोन तरुणींची सुटका
मोदी सरकारची ‘ही’ महत्वाची योजना १ एप्रिलपासून बंद होतेय
शिवसैनिकांनी केलेल्या मारहाण घटनेचा व्हिडिओ व्हायरल झाला आहे. या व्हिडिओत पाहिल्यास सुरुवातील काही लोकांनी या तरुणाला घेराव घातल्याचे दिसून येत आहे. त्यानंतर जमलेला सर्व घोळका त्या तरुणावर तुटून पडत आहे. आणि त्याला तुफान मारहाण करताना दिसत आहे. मात्र, एवढ्या गर्दीतही एक महिला पुढे येत या तरुणाला वाचवण्याचा प्रयत्न करत आहे. तसेच त्याला कडाडून मिठी मारत गर्दीतून बाहेर नेण्याचा प्रयत्न करत आहे. मात्र, या महिलेलाही मार लागल्याचे या व्हिडिओत दिसत आहे, पण बेभान झालेल्या गर्दीला याचे भान उरलेले नाही. या धक्कादायक प्रकाराने जळगावसह राज्यात खळबळ माजली आहे. या महिलेला या गर्दीत झालेली मारहाण सध्या सोशल मीडियावर व्हायरल होत आहे. ही महिला मारहाण झालेल्या व्यक्तीची पत्नी असल्याचे समोर आले आहे.
