जळगाव : जळगाव शहराजवळील असोदा रेल्वे गेटवर बंद पडलेल्या ट्रॅक्टरची बॅटरी तपासण्यासाठी खाली उतरलेल्या चालकाचा गिअरमध्ये असलेला ट्रॅक्टर अचानक सुरू झाल्याने त्याखाली चिरडून मृत्यू झाला. ही घटना बुधवारी घडली असून विठ्ठल यशवंत रायसिंग (वय ४५, रा. वाल्मिक नगर असोदा) असं मृत चालकाचं नाव आहे.
जळगाव तालुक्यातील असोदा येथील रहिवासी विठ्ठल रायसिंग हे ट्रॅक्टर चालक आहेत. बुधवारी सकाळी ट्रॅक्टर (एमएच १९ बीजी ६०७७) घेवून ते जळगावात दुरुस्तीसाठी आले होते. ट्रॅक्टरची दुरुस्ती केल्यानंतर सकाळी ११ वाजेच्या सुमारास ते ट्रॅक्टरवर असोदा येथे जात होते. याचवेळी असोदा रेल्वे गेट बंद असल्याने रस्त्यावर उभे होते. रेल्वेगेट उघडल्यानतंर ट्रॅक्टर अचानक बंद पडला. यावेळी चालकाने वायरच्या सहाय्याने ट्रॅक्टरच्या बॅटरीला करंट देऊन तो सुरू करण्याचा प्रयत्न केला. मात्र गिअरमध्ये असलेला ट्रॅक्टर अचानक सुरू झाला आणि ट्रॅक्टरच्या समोर उभा असलेले चालक विठ्ठल रायसिंग हे पुढील चाकाखाली चिरडले गेल्याने ते गंभीर जखमी झाले होते.
