परभणी प्रतिनिधी | सततची नापीकी आणि कर्जाला कंटाळून एका ४५ वर्षीय शेतकऱ्याने पत्नीची गळा दाबून हत्या केल्यानंतर स्वतः गळफास लावून आत्महत्या केल्याची घटना परभणी जिल्ह्यातील पालम तालुक्यात येणाऱ्या पुयनी येथे घडली आहे. रंगनाथ हरीभाऊ शिंदे वय ४५ , सविता रंगनाथ शिंदे वय ४० असे पुयनी येथील मृत पती पत्नीचे नाव आहे.
मिळालेल्या माहितीनुसार मयत रंगनाथ शिंदे यांना चार ते पाच एकर कोरडवाहू जमीन आहे . मात्र खरीप हंगामात झालेली अतिवृष्टी आणि सततची नापीकी , दुबार पेरणीचे संकट , त्यांच्याकडे असलेल्या कर्जामुळे ते विंचनेत होते . अखेर त्यांनी रविवार ९ जानेवारी रोजी रात्री अकरा ते बारा वाजण्याच्या सुमारास पत्नी सविता शिंदे या गाढ झोपेत असताना गळा दाबुन हत्या केली.
त्यानंतर शेतकरी रंगनाथ शिंदे यांनी घरातील माळवदाच्या लाकडी सरीला गळफास घेऊन आत्महत्या केली . दरम्यान शेतीची कामे करण्यासाठी शेतकरी रंगनाथ शिंदे यांनी दोन बैल घेतले होते . त्याच बरोबर शेतीला जोडधंदा म्हणून एक म्हैस घेतली होती . मात्र निसर्गाच्या अवकृपेमुळेसोयाबीन , तूर , मुग हातचे गेले गेल्याने त्यामुळे त्यांनी टोकाचे पाऊल उचलले असल्याचे बोलले जात आहे. दरम्यान या घटनेमुळे पुयनी गावात हळहळ व्यक्त केली जात आहे .
