जळगाव प्रतिनिधी | दोन आरटीओ एजंटांना लाच मागणी चांगलीच भोवली आहे. आरटीओ अधिकाऱ्यांच्या नावाने वाहन मालकाकडून दहा हजारांची लाच स्विकारताना दोघांना जळगाव लाचलुचपत प्रतिबंधक विभागाच्या पथकाने रंगेहाथ पकडले. या कारवाईमुळे लाचखोरांच्या गोटात प्रचंड खळबळ उडाली आहे. शुभम राजेंद्र चौधरी (२३, कोल्हे हिल्स गॅस गोडाऊनजवळ, जिजाऊ नगर, जळगाव ) व राम भीमराव पाटील ( ३७, अनुराग स्टेट बँक कॉलनी, महाबळ, जळगाव) अशी अटकेतील आरटीओ एजंट यांची नावे आहेत.
याबाबत सविस्तर असे की, खेडी बु.॥ (ता. जि.जळगाव) येथील एका 39 वर्षीय तक्रारदाराच्या तक्रारीवरून हा सापळा रचण्यात आला होता. आरोपी एजंटानी २३ नोव्हेंबर रोजी तक्रारदार यांनी साधारण प्रवासी बस विकत घेतल्यानंतर तिचे हस्तांतरण तक्रारदाराच्या वडिलांच्या नावावर करण्यासाठी दहा हजार रुपये लाचेची मागणी आरटीओ अधिकाऱ्यांच्या नावाने केली होती. तक्रारदाराने जळगाव ते एसीबीकडे तक्रार नोंदविल्यानंतर सापळा रचण्यात आला. मागणी केलेली लाचेची रक्कम स्वतःआरोपी शुभम चौधरी याने आरटीओ कार्यालय जळगावचे आवारात पंचासमक्ष स्वीकारली म्हणुन गुन्हा दाखल करण्यात आला आहे.
यांनी केला सापळा यशस्वी
पोलीस उपअधीक्षक शशिकांत एस.पाटील, पोलिस निरीक्षक संजोग बच्छाव, दिनेशसिंग पाटील, सुरेश पाटील, अशोक अहीरे, सुनील पाटील, रविंद्र घुगे, शैला धनगर, मनोज जोशी, सुनील शिरसाठ, जनार्धन चौधरी, प्रवीण पाटील, महेश सोमवंशी, नासीर देशमुख, ईश्वर धनगर, प्रदीप पोळ यांनी हा सापळा यशस्वी केला.
