जळगाव/जामनेर, (प्रतिनिधी)- जामनेर येथून जवळच असलेल्या पळासखेडा येथील कोविड कॉरंटाईन सेंटर मधून 15 कोरोना बाधित रुग्ण फुर्रर्रर्र…झाले असून त्यांच्या विरुद्ध साथ रोग प्रतिबंध कायदा 1897 चे उल्लंघन केल्याप्रकरणी वैद्यकीय अधिकारी डॉ. विनय सोनवणे यांनी पोलिसात गुन्हा दाखल केला आहे.
गेल्या काही दिवसांपासून राज्यात कोरोनाने डोकं वर काढले असतांना जामनेर येथून जवळ असलेल्या पळासखेडा येथील कोविड कॉरंटाईन सेंटर मधून चक्क 15 जण फुर्रर्रर्र झाल्याची धक्कादायक घटना समोर आल्याने खळबळ उडाली आहे.
याबाबत वैद्यकीय अधिकारी डॉ. विनय सोनवणे यांनी ‘नजरकैद’ शी बोलतांना कॉरंटाईन सेंटर मधून 15 जण पळाले असल्याच्या घटनेला दुजोरा दिला असून पुढे बोलतांना त्यांनी सांगितले की, पळालेल्या काही रुग्णांनी माझ्याशी संपर्क केला असून कॉरंटाईन सेंटर परत येत असल्याचं सांगितले आहे. तर इतरांशी आम्ही संपर्क करत आहोत. या सर्वाना परत आणण्यासाठी काम सुरु असल्याचं ते यावेळी म्हणाले.
