मुंबई : भारतीय हवामान विभागाने आज चांगली बातमी दिली आहे. ऑगस्टमध्ये दडी मारलेला मान्सून पुन्हा सक्रिय झाला असून सप्टेंबरमध्ये देशात सामान्यपेक्षा अधिक ११० टक्के पावसाचा अंदाज हवामान विभागाने वर्तवला आहे. भारतीय हवामान विभागाचे संचालक मृत्युंजय मोहपात्रा यांनी आज दिल्लीत माहिती दिली.
सप्टेंबरमध्ये मध्य भारताच्या अनेक भागांमध्ये सामान्यपेक्षा अधिक पाऊस पडेल, असा अंदाज त्यांनी व्यक्त केला आहे. देशात आतापर्यंत ९ टक्के कमी मान्सून बरसला आहे. पण सप्टेंबरमध्ये चांगला पाऊस पडण्याचा अंदाज आहे. ऑगस्टच्या आधी जूनमध्येही ७ टक्के कमी पाऊस पडला होता. तर ऑगस्टमध्ये सामान्यपेक्षाही २४ टक्के कमी पाऊस पडला होता. पण आता सप्टेंबमध्ये सामान्यपेक्षाही अधिक पावसाचा अंदाज आहे. उत्तर आणि इशान्य भारत आणि दक्षिण भारतातील काही भागांमध्ये सामान्यपेक्षाही कमी पाऊस पडेल, असं मोहपात्रा यांनी सांगितलं.
यंदा ऑगस्ट-सप्टेंबरदरम्यान संपूर्ण देशात सामान्य मान्सून बरसेल, असा अंदाज भारतीय हवामान विभागाने ऑगस्ट महिन्याच्या सुरवातीला वर्तवला होता. पण आतापर्यंत उत्तर पश्चिम भारतात सामान्यपेक्षा १३ टक्के पाऊस कमी पडला आहे. मध्य भारतात १४ टक्के कमी पाऊस झाला आहे. या भागात गुजरात, गोवा, मध्य प्रदेश, महाराष्ट्र, छत्तीसगड आणि ओडिशाचा समावेश आहे. बिहार, झारखंड, पश्चिम बंगाल आणि ईशान्यतेली राज्यांसह पूर्व आणि ईशान्य भागात आतापर्यंत ८ टक्के कमी पाऊस पडला आहे. तर दक्षिण भारतात आतापर्यंत सामान्यपेक्षा ५ टक्के अधिक पावसाची नोंद झाली आहे.
